ប្រទេសចិនបានផ្ដល់ការគាំទ្រដល់ប្រតិបត្តិការបង្ក្រាបគ្រឿងញៀនដ៏ចម្រូងចម្រាស់របស់ប្រធានាធិបតីហ្វីលីពីន លោក Rodrigo Duterte ដែលប្រតិបត្តិការនោះទទួលរងការរិះគន់ពីសំណាក់ក្រុមសិទ្ធិមនុស្ស។ ក្រុមសិទ្ធិមនុស្សប្រឆាំងនឹងប្រតិបត្តិការនេះ ដោយសារវាជំរុញឲ្យមានការសម្លាប់មនុស្សក្រៅប្រព័ន្ធតុលាការ។
ទីភ្នាក់ងារព័ត៌មាន AFP បានដកស្រង់សេចក្ដីថ្លែងការណ៍ស្ថានទូតចិនប្រចាំទីក្រុងម៉ានីល ដែលបានថ្លែងកាលពីថ្ងៃម្សិលមិញថា៖ «ប្រទេសចិនបានយល់ទាំងស្រុងថារដ្ឋាភិបាលហ្វីលីពីនក្រោមការដឹកនាំរបស់លោក Rodrigo Duterte បានផ្ដល់អាទិភាពលើការបង្ក្រាបបទល្មើសទាក់ទងនឹងគ្រឿងញៀន»។
ស្ថានទូតចិនបានបន្តថា៖ «ចិនយ៉ាងច្បាស់នូវឆន្ទៈរបស់ចិនចំពោះរដ្ឋាភិបាលថ្មី ចំពោះកិច្ចសហប្រតិបត្តិការប្រកបដោយប្រសិទ្ធភាពនៅក្នុងបញ្ហានេះ និងដាក់ចេញផែនការសកម្មភាពជាក់លាក់ជាមួយភាគីហ្វីលីពីន»។
លោក Duterte បានឡើងកាន់អំណាចកាលពីខែឧសភា បន្ទាប់ពីលោកសន្យាបង្ក្រាបគ្រឿងញៀន ហើយមនុស្សជិត២០០នាក់ហើយ ត្រូវបានគេបញ្ជាក់ថាត្រូវបានសម្លាប់នៅក្នុងប្រតិបត្តិការបង្ក្រាបគ្រឿងញៀនរយៈពេល២ខែមកនេះ។
សេចក្ដីថ្លែងការណ៍របស់ស្ថានទូតចិនត្រូវបានធ្វើឡើងដោយមិនបានយោងទៅលើការសម្លាប់នោះឡើយ ដែលផ្ទុយទៅនឹងក្រុមសិទ្ធិមនុស្សជាតិនិងអន្តរជាតិដែលនិយាយថាការបង្ក្រាបបទល្មើសទាក់ទងនឹងគ្រឿងញៀនគឺជាការទទួលខុសត្រូវរួមរបស់ប្រទេសទាំងអស់នៅលើពិភពលោក៕
