ក្រុមសមាជិកសភានិងអ្នកនេសាទតៃវ៉ាន់កំពុងតែធ្វើដំណើរទៅកោះមួយស្ថិតក្នុងតំបន់មានជម្លោះនៅសមុទ្រចិនខាងត្បូងនៅថ្ងៃពុធនេះ ដើម្បីតវ៉ាជំទាស់ទៅនឹងសាលក្រមរបស់តុលាការអន្តរជាតិមួយ ដែលធ្វើឲ្យប៉ះពាល់ដល់សិទ្ធិជាម្ចាស់របស់កោះតៃវ៉ាន់នៅទីនោះ។
ទីភ្នាក់ងារព័ត៌មាន AFP បានផ្សាយថាសមាជិកសភា៨រូបមកពីគណបក្ស DPP និងគណបក្សជំទាស់គួមីងតាង បានធ្វើដំណើរតាមយន្តហោះយោធាមួយនៅព្រឹកថ្ងៃពុធនេះទៅកោះតៃប៉ីងដែលគ្រប់គ្រងដោយតៃវ៉ាន់ស្ថិតនៅតាមជួរកោះ Spratly។
នៅព្រឹកថ្ងៃពុធនេះដែរទូកនេសាទ៥គ្រឿងក៏បានធ្វើដំណើរចេញពីភាគខាងត្បូងស្រុកប៉ីងតុងសំដៅទៅកោះតៃប៉ីង បន្ទាប់ពីពួកគេយល់ថាជីវភាពរបស់អ្នកនេសាទរងការគំរាមកំហែង។ ទូកនេសាទទាំងនោះនឹងទៅដល់កោះនោះ៥ថ្ងៃក្រោយ។
ការតវ៉ារបស់តៃវ៉ាន់បានកើតឡើងបន្ទាប់ពីតុលាការមជ្ឈត្តកម្មអចិន្ត្រៃយ៍នៅទីក្រុងឡាអេកាលពីថ្ងៃទី១២ ខែកក្កដា បានសម្រេចថាប្រទេសចិនគ្មានសិទ្ធិជាម្ចាស់លើជួរកោះទាំង៩ស្ថិតនៅសមុទ្រចិនខាងត្បូងនោះឡើយ ហើយតុលាការនោះបញ្ជាក់ថាចិនបានរំលោភលើសិទ្ធិអធិបតេយ្យភាពហ្វីលីពីននៅក្នុងតំបន់សេដ្ឋកិច្ចផ្ដាច់មុខនោះ។
សេចក្ដីសម្រេចនេះបានធ្វើឲ្យប៉ះពាល់ដល់ការអះអាងរបស់កោះតៃវ៉ាន់ជាម្ចាស់ទៅលើកោះតៃប៉ីង ដែលជាកោះធំជាងគេនៅក្នុងជួរកោះ Spratly។
តៃវ៉ាន់កាលពីសប្ដាហ៍មុនក៏បានបញ្ជូននាវាចម្បាំងមួយគ្រឿងទៅសមុទ្រចិនខាងត្បូង ដើម្បីការពារដែនទឹក ដែលតៃវ៉ាន់បានអះអាងជាម្ចាស់៕