ស្រ្តីអាយុ ៥២ឆ្នាំម្នាក់ លោកស្រី នួន សុភី រស់នៅក្នុងភូមិរ៉ា សង្កាត់ស្វាយអាត់ ក្រុងនិងខេត្តពោធិ៍សាត់ ធ្លាប់បានបំពេញការងារជាជំនួយការភូមិ រហូតគាត់បានជាប់ជាចៅសង្កាត់ ក្នុងអាណត្តិទី ៤នេះ។
ចៅសង្កាត់ស្វាយអាត់ថ្មី លោកស្រី នួន សុភី បានផ្ដល់បទសម្ភាសន៍ដល់អ្នកសារព័ត៌មាន វីអូឌីថា កន្លងទៅគាត់ធ្លាប់ធ្វើជាជំនួយការភូមិ រហូតដល់ឆ្នាំ ២០១២ គាត់ត្រូវបានតែងតាំងធ្វើជាក្រុមប្រឹក្សាសង្កាត់។ លោកស្រីបានឲ្យដឹងទៀតថា ចាប់តាំងពីបំពេញការងារជាជំនួយការភូមិ រហួតដល់ក្រុមប្រឹក្សាសង្កាត់ នាពេលកន្លងមក គាត់បានជំរុញឲ្យពន្លឿនការដោះស្រាយបញ្ហារបស់ប្រជាពលរដ្ឋនៅថ្នាក់មូលដ្ឋាន ដោយមិនរើសអើង និងមិនយកតម្លៃសេវាលើសពីច្បាប់កំណត់ឡើយ ។ អ្នកស្រីបញ្ជាក់ថា «ភាពងាយស្រួល របស់ខ្ញុំក្នុងការបំពេញតួនាទីរយៈកាលកន្លងមក ក៏ដូចជាពេលនេះគឺដោយសារតែក្រុមប្រឹក្សាមានការឯកភាព និងសហការគ្នាបានល្អ មានការយោគយល់គ្នា និងមានការជ្រោមជ្រែងនិងលើកទឹកចិត្តពីក្រុមគ្រួសារផងដែរ » ។
ពលរដ្ឋម្នាក់រស់នៅ ភូមិរ៉ា អ្នកស្រី នួន ខាន់ បាននិយាយថា «ទោះបីលោកស្រី នួន សុភី មិនជាប់ជាមេឃុំក៏ប្រជាពលរដ្ឋនៅតែស្រលាញ់គាត់ដែរ ព្រោះគាត់មិនចេះស៊ីលុយស៊ីកាក់»។
ពលរដ្ឋម្នាក់ទៀត លោក ទូច ជាពលរដ្ឋម្នាក់ទៀតរស់នៅក្នុងភូមិខាងលើ បានលើកឡើងប្រហាក់ប្រហែលគ្នាថា អ្នកស្រី នួន សុភី ដែលទើបនិងជាប់ឆ្នោតជាចៅសង្កាត់ថ្មីនេះ ជាមនុស្សសកម្មក្នុងការចុះជួយដោះស្រាយបញ្ហាជូនប្រជាពលរដ្ឋ ដោយមិនរើសអើង។ លោកបន្តថា អ្នកស្រី នួន សុភី ជាស្ត្រីម្នាក់ដែលគួរឲ្យគោរពស្រលាញ់ ទើបគាត់ក៏ដូចជាអ្នកភូមិផ្សេងទៀត បោះឆ្នោតគាំទ្រឲ្យធ្វើជាថ្នាក់ដឹកនាំប្រចាំឃុំនេះ ដើម្បីបន្តអភិវឌ្ឍន៍ឃុំសង្កាត់ឲ្យកាន់តែរីកចំរើនថែមទៀត។
ដោយពលរដ្ឋសារពត៌មានខេត្តពោធិ៍សាត់ លោកព្រំ ចាន់ដេង និងលោក មឿន ឈឿន
