ស្ត្រីជាមេឃុំ មួយរូបដែលទើបតែកាន់តំណែងបានជាង១០ថ្ងៃបានប្ដេជ្ញាថានឹងលុបបំបាត់អំពើពុករលួយ និង កាត់បន្ថយបញ្ហាចំណាកស្រុករបស់ប្រជាពលរដ្ឋ។
មេឃុំថ្មីមកពីគណបក្សសង្រោះជាតិ អ្នកស្រី ឡាញ់ ថាវរី ដែលទើបនឹងជាប់ឆ្នោតជាមេឃុំ នៅឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ បានផ្តល់បទសម្ភាសដល់ក្រុមអ្នកសារពត៌មាន វីអូឌី(VOD) នៅថ្ងៃទី ២១ ខែកក្កដា ឆ្នាំ ២០១៧ នេះថា ប្រជាពលរដ្ឋដែលរស់នៅក្នុងឃុំនេះមានចំនួនប្រហែល ២៥០០០នាក់ ដែលភាគច្រើនប្រកបមុខរបរកសិកម្ម តែដោយកសិផលរបស់ពួកគាត់ ពេលប្រមូលបានលក់មិនចេញ គ្មានប្រាក់សងបំណុលគេ កសិករមួយចំនួនបានសម្រេចចិត្តធ្វើការចំណាកស្រុក។ លោកស្រីបន្តទៀតថា « ខ្ញុំនឹងរកទីផ្សារ ជូនកសិករឲ្យមានលំនឹង ដើម្បីកាត់បន្ថយការចំណាកស្រុករបស់ពួកគាត់»។ ដោយឡែកអ្នកស្រីបញ្ជាក់បន្ថែម ទៅលើការយកកំរៃសេវាសាធារណៈលើសពីក្រសួងបានកំណត់ថា គាត់នឹងដោះស្រាយជួនភ្លាមប្រសិនបើមានករណី ទាប្រាក់តម្លៃសេវាសាធារណៈលើសពីការកំណត់របស់ក្រសួង ហើយលោកស្រី នឹងបំបាត់អំពើពុករលួយបន្តិចម្តង រហូតទាល់តែបាត់អស់៕
រាយការណ៍ដោយពលរដ្ឋសារពត៌មាន ខេត្តបន្ទាយមានជ័យ លោករឿន រ៉ាប
