គណបក្សសង្គ្រោះជាតិសម្រេចដាក់លិខិតទូលថ្វាយព្រះមហាក្សត្រសុំកុំឲ្យព្រះអង្គឡាយព្រះហស្តលេខាទៅលើច្បាប់ស្តីពីគណបក្សនយោបាយដែលត្រូវបានតំណាងរាស្ត្រគណបក្សកាន់អំណាចកែប្រែជាលើកទី២ ដោយថាច្បាប់នេះកំពុងតែបំបិទសិទ្ធសេរីភាពនយោបាយ និងបំពានទៅលើលិទ្ធិប្រជាធិបតេយ្យ។
វិសោធនកម្មច្បាប់ស្តីពីគណបក្សនយោបាយដែលធ្វើឡើងតាមសំណើលោក ហ៊ុន សែន បានឆ្លងកាត់ស្ថាប័ននីតិបញ្ញត្តិរួចរាល់ហើយក្នុងសប្តាហ៍នេះ ហើយនឹងត្រូវបញ្ជូនទៅកាន់ស្ថាប័នព្រះមហាក្សត្រក្នុងពេលឆាប់ៗនេះ។
អនុប្រធានគណបក្សសង្គ្រោះជាតិ លោកស្រី មូ សុខហួរ បានឲ្យវីអូឌីដឹងថាគណបក្សនឹងបញ្ជូនលិខិតទូលថ្វាយព្រះមហាក្សត្រនៅរសៀលថ្ងៃទី២០ កក្កដានេះ សុំកុំឲ្យព្រះអង្គឡាយព្រះហស្តលេខាលើច្បាប់នេះ។ លោកស្រីថាច្បាប់នេះមិនបានធ្វើឲ្យលិទ្ធិប្រជាធិបតេយ្យសេរីពហុបក្សនៅកម្ពុជារីចំរើននោះទេ មានតែបិទសិទ្ធិសេរីភាពគណបក្សនយោបាយ គ្មានផលប្រយោជន៍ដល់ប្រទេសជាតិ និងប៉ះពាល់ដល់ការបោះឆ្នោតនៅកម្ពុជា។
លោកស្រីមានប្រសាសន៍ថា៖ «ក្នុងតួនាទីយើងជាអ្នកតំណាងរាស្ត្រយើងត្រូវជ្រើសរើសយកយន្តការ ដែលយើងអាចប្រើបានដើម្បី បង្ហាញជំហររបស់យើងដើម្បីការពារផលប្រយោជន៍ប្រទេសជាតិ ជាពិសេសការពារសិទ្ធិសេរីភាព ប្រជាពលរដ្ឋយើង។ ហើយសំខាន់ជាងនេះសិទ្ធិនយោបាយ ជាមួយគ្នានេះដែរលើកស្ទួយលិទ្ធប្រជាធិបតេយ្យ។ ហើយក្នុងនោះយើងបានបង្ហាញជំហររបស់យើងក្នុងនាមជាគណបក្ស ដោយមានចេញសេចក្តីថ្លែងការរួចទៅហើយ»។
អ្នកនាំពាក្យរដ្ឋសភាកម្ពុជាលោក ឡេង ប៉េងឡុង មានប្រសាសន៍ថា រដ្ឋសភាបានបញ្ជូនច្បាប់នេះទៅកាន់ក្រុមប្រឹក្សាធម្មនុញ្ញដើម្បីពិនិត្យពីធម្មនុញ្ញភាពហើយកាលពីម្សិលមិញ។ តែលោកមិនទាន់អាចបញ្ជាក់ទេថា ពេលណាដែលច្បាប់នេះនឹងត្រូវបញ្ជូនទៅកាន់ស្ថាប័នព្រះមហាក្សត្រនោះ។
លោកមានប្រសាសន៍ថា៖ «អូ! មិនទាន់ដឹងផង ក្រុមប្រឹក្សាធម្មនុញ្ញគាត់មិនទាន់ធ្វើអីផង។ មិនដឹងថាគាត់ធ្វើអីហើយនៅថ្ងៃណាយើងក៏មិនដឹង។ … (បន្ទាប់ពីក្រុមប្រឹក្សាធម្មនុញ្ញពិនិត្យរួច) បញ្ជូនមករដ្ឋសភាវិញ រដ្ឋសភានឹងបញ្ជូនទៅរាជរដ្ឋាភិបាល រាជរដ្ឋាភិបាលនឹងគោរពស្នើសុំព្រះមហាក្សត្រដើម្បីប្រទានការប្រកាសឲ្យប្រើ»។
គួររំលឹកផងដែរថាការកែច្បាប់គណបក្សនយោបាយជាលើកទី២នេះធ្វើតាមសំណើផ្ទាល់មាត់របស់លោក ហ៊ុន សែន កាលពីចុងខែមិថុនាកន្លងទៅ ក្នុងពិធីរំលឹកខួបអនុស្សាវរីយ៍៦៦ឆ្នាំ នៃការបង្កើតគណបក្សប្រជាជនកម្ពុជា។
គណបក្សប្រជាជនអះអាងថា ច្បាប់នេះនឹងរារាំងមិនឲ្យមានការដាក់តាំងរូបលោក សម រង្ស៊ី នៅពីក្រោយគណបក្សសង្រ្គោះជាតិដូចមុនៗទេ ដោយលោកបក្សកាន់អំណាចចាត់ទុកលោក សម រង្ស៊ី ជាទណ្ឌិត។ លោក ឈាង វុន អ្នកនាំពាក្យតំណាងរាស្ត្រគណបក្សប្រជាជនកម្ពុជា និយាយថា ច្បាប់នោះក៏នឹងទប់ស្កាត់មិនឲ្យមហាអំណាចណាមួយប្រើឥទ្ធិពល នាំលោក សម រង្ស៊ី ចូលកម្ពុជាវិញផងដែរ។
អ្នកឃ្លាំមើលដំណើរការសភា បានហៅថាច្បាប់នេះថាធ្វើឡើងដោយមិនបានបើកទូលាយឲ្យភាគីពាក់ព័ន្ធបានចូលរួមផ្តល់យោបល់នោះទេ និងថាប្រើសម្រាប់តែប្រយោជន៍បុគ្គលតែម្នាក់។
ច្បាប់គណបក្សនយោបាយ ដែលបានអនុម័តកាលពីឆ្នាំ១៩៩៧ ត្រូវបានស្នើធ្វើវិសោធនកម្មឡើងវិញម្តងហើយ ដោយលោក ហ៊ុន សែន កាលពីចុងខែមករាឆ្នាំ២០១៧ និងត្រូវបានចូលជាធរមាន បន្ទាប់ពីបានចុះហត្ថលេខា កាលពីថ្ងៃទី៧ខែមីនា ដោយលោក សាយ ឈុំ ប្រធានព្រឹទ្ធសភានិងជាប្រមុខរដ្ឋស្តីទី ជំនួសព្រះមហាក្សត្រ ដែលបានយាងទៅចិន៕
