យោងតាមការចុះផ្សាយរបស់កាសែតបាងកកប៉ុស្តិ៍ បានឲ្យដឹងថា ចាប់ពីចុងខែក្រោយទៅ ប្រទេសថៃគ្រោងដំឡើងតម្លៃទិដ្ឋាការសម្រាប់ភ្ញៀវទេសចរបរទេសមកពីប្រទេស និងដែនដីចំនួន ១៩។
កាសែតថៃមួយនេះ ដែលបានដកស្រង់ព័ត៌មានពីវេបសាយរបស់ក្រសួងការបរទេសថៃ បានផ្សាយថា ភ្ញៀវទេសចរបរទេសមកពីបណ្ដាប្រទេស និងដែនដីចំនួន ១៩ នឹងតម្រូវឲ្យបង់ទិដ្ឋាការពេលមកដល់ មានខ្ពស់ជាងមុន ពោលគឺកើនឡើង ១ពាន់បាត ដល់ ២ពាន់បាត។
ក្រសួងការបរទេសថៃ បាននិយាយថា រដ្ឋាភិបាលថៃបានសម្រេចដំឡើងតម្លៃទិដ្ឋាការពេលមកដល់ កាលពីខែមករាកន្លងមក។
ក្រសួងនេះបានពន្យល់ថា ការដំឡើងតម្លៃនេះ ត្រូវបានធ្វើឡើងដើម្បីកាត់បន្ថយការរង់ចាំយូរ នៅកន្លែងត្រួតពិនិត្យអន្តោប្រវេសន៍៕