ប្រធានាធិបតីចិន លោក ស៊ី ជិនពីង បានប្រាប់មេដឹកនាំភូមា លោកស្រី អ៊ុងសាន ស៊ូជី កាលពីថ្ងៃសុក្រម្សិលមិញថា ចិនចង់បញ្ជាក់ឲ្យច្បាស់ពីទំនាក់ទំនងក្នុងទិសដៅត្រឹមត្រូវ ខណៈសកម្មជនភូមា បានសរសេរលិខិតទៅលោក ស៊ី ដោយនិយាយថា ពួកគេចង់ឲ្យចិនដោះស្រាយក្ដីបារម្ភអំពីគម្រោងទំនប់វារីអគ្គិសនីដែលបានផ្អាក។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
យោងតាម Reuters ចិនចាប់ផ្ដើមទំនាក់ទំនងកាទូតឡើងវិញ ចាប់តាំងពីរដ្ឋាភិបាលលោកស្រី ស៊ូជី បានចូលកាន់អំណាចកាលពីខែមេសាកន្លងមក ដោយមានបំណងបង្កើតទំនាក់ទំនងល្អជាមួយនឹងប្រទេសសម្បូរធនធានធម្មជាតិមួយនេះ។
ទីភ្នាក់ងារព័ត៌មាន Reuters បានដកស្រង់សម្ដីលោក ស៊ី ដែលបានប្រាប់ទៅលោកស្រី ស៊ូជី ថា ប្រជាជននៅភូមា ស្ថិតក្នុងចំណុចចាប់ផ្ដើមថ្មីមួយ សម្រាប់អនាគតដ៏អស្ចារ្យរបស់ប្រទេសនេះ។
លោក ស៊ី ថ្លែងបន្តថា៖ «យើងគួរតែប្រកាន់តាមទិសដៅត្រឹមត្រូវ ដើម្បីជំរុញការរីកចម្រើនថ្មីផ្នែកទំនាក់ទំនងទ្វេភាគី និងនាំមកនូវផលប្រយោជន៍ដល់ប្រជាជនប្រទេសទាំងពីរ»។
ប៉ុន្តែ លោក ស៊ី មិនបាននិយាយអំពីគម្រោងសាងសង់ទំនប់វារីអគ្គិសនីតម្លៃ ៣.៦ពាន់លានដុល្លារ ដែលវិនិយោគដោយប្រទេសចិននោះឡើយ។
គម្រោងសាងសង់ទំនប់វារីអគ្គិសនីនោះ ត្រូវបានផ្អាក កាលពីឆ្នាំ២០១១ នៅពេលអតីតប្រធានាធិបតីភូមា លោក ថេន សេន ខឹងសម្បារនឹងចិន៕
