ព្រះតេជគុណ ប៊ុត ប៊ុនតិញ ស្ថាបនិកនៃបណ្ដាញព្រះសង្ឃឯករាជ្យ ដើម្បីយុត្តិធម៌សង្គម ត្រូវបានលោកនាយករដ្ឋមន្ត្រី ហ៊ុន សែន អញ្ចើញឲ្យចូលរួមក្នុងវេទិកាស្ដីពី«ការការពារ និងអភិរក្សបរិស្ថានធម្មជាតិ» នៅដើមសប្ដាហ៍ក្រោយ បន្ទាប់ពីប្រមុខរដ្ឋាភិបាលប្រកាសគាំទ្រចលនាការពារព្រៃឈើរបស់មហាជន។
យោងតាមលិខិតរបស់ក្រសួងបរិស្ថានចុះថ្ងៃទី០៩ ខែសីហា ឆ្នាំ២០១៦ ព្រះតេជគុណ ប៊ុត ប៊ុនតិញ ត្រូវបានក្រសួងបរិស្ថាននិមន្តឲ្យចូលរួមក្នុងវេទិកាស្ដីពីការការពារ និងអភិរក្សបរិស្ថាន ដែលនឹងរៀបចំធ្វើឡើងនៅវិមានសន្តិភាព នៅថ្ងៃទី២២ ខែសីហា បន្ទាប់ពីមានការអនុញ្ញាតពីលោកនាយករដ្ឋមន្ត្រី ហ៊ុន សែន។
ព្រះតេជគុណ ប៊ុត ប៊ុនតិញ ដែលជាសង្ឃសកម្មក្នុងកិច្ចការពារបរិស្ថាន និងពិធីបុណ្យសពលោកបណ្ឌិត កែម ឡី នោះ បានបង្ហោះសារនៅលើទំព័រហ្វេសប៊ុករបស់ព្រះអង្គថា ព្រះអង្គមានបំណងនិមន្តទៅចូលរួមក្នុងវេទិកានេះ បើទោះបីជាពុំដឹងពីរបៀបវារៈនៃវេទិកានោះក៏ដោយ។
ព្រះអង្គបញ្ជាក់ថា៖ «វេទិកានេះមានលក្ខណៈនយោបាយបន្តិច តែអាត្មាគិតថា ចង់យកឱកាសនេះ និមន្តទៅចូលរួម ដើម្បីជជែកអំពីបញ្ហាមួយចំនួន ទាក់ទិននឹងការបំផ្លិចបំផ្លាញបរិស្ថានធម្មជាតិដ៏ធ្ងន់ធ្ងរនៅកម្ពុជាបច្ចុប្បន្ន ដែលក្រុមការងារបានរកឃើញក្នុងរយៈពេល ៦ខែកន្លងមក ព្រមទាំងបញ្ហាប្រឈមនានាក្នុងការបំពេញការងារ»។
ព្រះតេជគុណ ប៊ុត ប៊ុនតិញ អះអាងថា ព្រះអង្គមានបំណងចូលរួមក្នុងវេទិកានោះ ដើម្បីទាមទារឲ្យមានការប្ដេជ្ញាការពារពីលោករដ្ឋមន្ត្រីបរិស្ថាន និងអាជ្ញាធរពាក់ព័ន្ធ ឲ្យអនុវត្តនូវគោលនយោបាយការពារព្រៃឈើ និងធនធានធម្មជាតិ ដែលនៅសេសសល់។
ក្រៅពីព្រះសង្ឃអង្គនេះ កញ្ញា ធី សុវណ្ណថា ក៏ត្រូវបានក្រសួងបរិស្ថានអញ្ចើញឲ្យចូលរួមក្នុងវេទិកានេះផងដែ បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី០១ ខែកក្កដាកន្លងមក បានគាំទ្រដល់ចលនាការពារព្រៃឈើ៕