លោកនាយករដ្ឋមន្ត្រីកម្ពុជា ហ៊ុន សែន បានកំណត់ពេលវេលាជាក់លាក់ពីរថ្ងៃក្នុងមួយសប្ដាហ៍ដើម្បីជួបសំណះសំណាល និងចុះសួរសុខទុក្ខកម្មករតាមបណ្ដារោងចក្រនានា។ នេះបើតាមទំព័រហ្វេសប៊ុកផ្លូវការរបស់លោក។
ទំព័រហ្វេសប៊ុករបស់លោក បានឲ្យដឹងបែបនេះ បន្ទាប់ពីលោក ហ៊ុន សែន បានជួបសំណេះសំណាលជាមួយកម្មករកម្មការិនីជាង ៤២០០នាក់ នៅឯកោះពេជ្រ នៅព្រឹកថ្ងៃនេះ។
ទំព័រហ្វេសប៊ុកផ្លូវការរបស់លោក បានរៀបរាប់ថា៖ «សម្តេចតេជោបានកំណត់យករៀងរាល់ថ្ងៃអាទិត្យ ដើម្បីជួបសំណោះសំណាល សួរសុខទុក្ខកម្មករ កម្មការិនី ហើយនៅរៀងរាល់ថ្ងៃពុធ សម្តេចនឹងអញ្ជើញចុះសួរសុខទុក្ខ កម្មករ កម្មការិនីតាមបណ្តារោងចក្រ សហគ្រាសនានា»។
ទំព័រហ្វេសប៊ុកដដែលបន្តថា ការជួបជុំនេះក្នុងបំណងស្វែងយល់ពីសុខទុក្ខ លក្ខខណ្ឌការងារ ការទំនាក់ទំនងរវាងកម្មករ និយោជិតជាមួយនិយោជក និងទទួលសំណូមពរនានា ដើម្បីសម្រួលដល់កម្មករនិយោជិតឲ្យកាន់តែមានលក្ខខណ្ឌការងារល្អ និងមានផលិតភាពការងារប្រសើរជាងមុន។
ចាប់តាំងពីឆ្នាំ២០១៦មក លោកនាយករដ្ឋមន្ត្រី ហ៊ុន សែន បានរៀបចំពិធីជួបសំណេះសំណាលជាបន្តបន្ទាប់ជាមួយមន្ត្រីរាជការសាធារណៈ ក្រុមអាជីវករ កងកម្លាំងប្រដាប់អាវុធនៅរាជធានីភ្នំពេញ និងតាមបណ្ដាខេត្តនានា ចាប់តាំងពីចុងខែកក្កដាឆ្នាំមុន ហើយចុងក្រោយជាមួយក្រុមកម្មករកម្មការិនី។
លោក ហ៊ុន សែន បានអះអាងកាលពីថ្ងៃទី២២ ខែសីហាឆ្នាំមុនថា ដំណើរចុះជួបសំណេះសំណាលជាមួយមហាជន គឺដើម្បីស្វែងរកការគាំទ្រពីប្រជាពលរដ្ឋ៕