មេដឹកនាំបក្សប្រឆាំង លោក កឹម សុខា បានលើកឡើងថា អ្នកនយោបាយកម្ពុជា មិនត្រូវកាប់សម្លាប់គ្នា ហើយក៏មិនចាំបាច់ឱបរឹតគ្នាដែរ ផ្ទុយទៅវិញ លោកស្នើឲ្យមានត្រឹមតែចាប់ដៃគ្នាដើម្បីកសាងប្រទេសកម្ពុជា ឲ្យមានការផ្លាស់ប្ដូរជាវិជ្ជមាន និងផ្ដល់ភាពរីកចម្រើនសម្រាប់ប្រជាពលរដ្ឋខ្មែរបានហើយ។
លោក កឹម សុខា បានលើកឡើងបែបនេះ ជាង ២ឆ្នាំក្រោយពីលោកនាយករដ្ឋមន្ត្រី ហ៊ុន សែន និងអតីតមេដឹកនាំបក្សប្រឆាំង លោក សម រង្ស៊ី បានកសាងទំនាក់ទំនងល្អូកល្អឺននឹងគ្នាអស់រយៈពេលប៉ុន្មានខែកាលពីឆ្នាំ២០១៥ រហូតដល់អ្នកទាំងពីរបានចូលរួមបុណ្យអង្គរសង្ក្រានរួមគ្នានៅឯខេត្តសៀមរាបនៅខែមេសា ហើយចុងក្រោយក្រុមគ្រួសារនៃអ្នកនយោបាយទាំងពីរនេះ បានជួបជុំគ្នាបរិភោគអាហារពេលល្ងាចនៅរាជធានីភ្នំពេញ នៅក្នុងខែកក្កដា។
ទំនាក់ទំនងដ៏ល្អរយៈពេលខ្លីរបស់មេដឹកនាំនយោបាយទាំងពីរនាពេលនោះ ត្រូវបានគេមើលឃើញថា កើតឡើងក្រោយពីមានកិច្ចព្រមព្រៀងនយោបាយ និងវប្បធម៌សន្ទនា បន្ទាប់ពីការជាប់គាំងនយោបាយនៅក្រោយការបោះឆ្នោតជាតិឆ្នាំ២០១៣។
ទោះជាយ៉ាងណាក៏ដោយ ភាពល្អូកល្អឺនរបស់មេដឹកនាំនយោបាយទាំងពីររូបនេះ បានឈានដល់ទីបញ្ចប់ ដោយលោក សម រង្ស៊ី ត្រូវបានប្ដឹងដោយលោក ហ៊ុន សែន និងមេដឹកនាំជាន់ខ្ពស់ដទៃទៀតរបស់បក្សកាន់អំណាច ខណៈដែលលោកនាយករដ្ឋមន្ត្រី បានចោទលោក សម រង្ស៊ី ថា ចាប់ដៃជាន់ជើង។
នៅលើទំព័រហ្វេសប៊ុករបស់លោកដែលសរសេររៀបរាប់ភ្ជាប់ជាមួយរូបភាពនៃការចុះជួបថ្នាក់ដឹកនាំមូលដ្ឋានរបស់ខ្លួនក្នុង ខេត្តបន្ទាយមានជ័យ នាព្រឹកថ្ងៃទី ២០ ខែសីហានេះ លោក កឹម សុខា មេដឹកនាំគណបក្សសង្គ្រោះជាតិបច្ចុប្បន្ន បានថ្លែងថា៖ «ខ្ញុំសង្កេតឃើញថា អ្នកនយោបាយខ្មែរកន្លងមក ពេលត្រូវរ៉ូវគ្នា ធ្វើជាឱបរឹត ស្និទ្ធស្នាលគ្នា ទាំងគ្រួសារ។ ពេលខ្វែងគំនិតគ្នា វាយប្រហារគ្នាស្ទើរតែស៊ីសាច់ហុតឈាមគ្នា។ អាកប្បកិរិយាទាំងនេះ វាហួសហេតុពេកហើយ ព្រោះជាលទ្ធផល វានឹងបំផ្លាញខ្លួនឯង បំផ្លាញសង្គមខ្មែរ និងរហូតដល់បំផ្លាញប្រទេសជាតិយើងទៀតផង» ។
លោកបន្ថែមថា គណបក្សសង្គ្រោះជាតិមិនចង់ឃើញការកាប់សម្លាប់គ្នា ឬឱបរឹតគ្នាទេ ប៉ុន្តែ លោកថា ចង់ឲ្យមានការចាប់ដៃគ្នាដើម្បីកសាងសង្គម ឲ្យមានការផ្លាស់ប្ដូរជាវិជ្ជមាន និងសេចក្ដីសុខចម្រើនសម្រាប់ប្រជាពលរដ្ឋ។
លោកក៏លើកឡើងដែរថា អ្នកនយោបាយ ឬ គណបក្សនយោបាយខ្មែរ គូរប្រកួតប្រជែងគ្នាតែទស្សនៈរៀងៗខ្លួន និងជៀសវាងការជេរប្រមាថ លាបពណ៌ គំរាមកំហែង និងបង្កការឈឺចាប់ចំពោះខ្មែរគ្នាឯង៕