មនុស្សជិត ៦០០នាក់ បានស្លាប់ ហើយរាប់លាននាក់ បានរងផលប៉ះពាល់ដោយសារទឹកជំនន់នៅតំបន់អាស៊ីខាងត្បូង ខណៈដែលប្រតិបត្តិការផ្ដល់ជំនួយ និងជួយសង្គ្រោះនៅតែបន្តធ្វើ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីមន្ត្រី។
នៅក្នុងប្រទេសឥណ្ឌា អាជ្ញាធរបានស្វែងរកជំនួយពីទាហាននៅក្នុងស្រុកចំនួនពីរ ស្ថិតនៅខាងជើងរដ្ឋឧត្ដរប្រាដេស បន្ទាប់ពីភ្លៀងធ្លាក់ថ្មីៗបន្ថែមទៀត បណ្ដាលឲ្យលិចលង់ភូមិឋានរាប់រយកន្លែង។
ស្រុកដល់ទៅ ៣៣ នៅក្នុងចំណោមស្រុក ៧៥ នៅក្នុងរដ្ឋមួយនេះ កំពុងលិចលង់ដោយសារទឹកជំនន់ ដែលបានសម្លាប់មនុស្សដល់ទៅ ៥៥នាក់។
តួលេខអ្នកស្លាប់នៅក្នុងរដ្ឋប៊ីហា បានកើនឡើងដល់ចំនួន ១៥៣នាក់ ក្រោយពីមានទឹកជំនន់ដ៏ខ្លាំងក្លាបំផុតមួយគិតចាប់តាំងពីឆ្នាំ២០០៨មក។ សរុបចូលគ្នាទាំងរដ្ឋប៊ីហា និងឧត្ដរប្រាដេស ប្រជាជន ២៨លាននាក់ បានរងផលប៉ះពាល់។
នៅក្នុងរដ្ឋអាសាម ទឹកជំនន់ក៏បានសម្លាប់មនុស្សយ៉ាងតិច ៦០នាក់ផងដែរ ខណៈមនុស្សជិត ៤២ម៉ឺន ៥ពាន់នាក់ទៀត រស់នៅក្នុងជំរុំផ្ដល់ជំនួយ៕
