អាជ្ញាធរទេសចរណ៍ថៃរំពឹងថាចំនួនភ្ញៀវទេសចរចូលទៅប្រទេសមួយនេះ នឹងកើនឡើងក្នុងរង្វង់ជិត១៨ភាគរយ នៅក្នុងត្រីមាសចុងក្រោយនៃឆ្នាំ២០១៦ បើធៀបទៅនឹងរយៈពេលដូចគ្នាក្នុងឆ្នាំ២០១៥កន្លងមក។
ក្រុមប្រឹក្សាទេសចរណ៍ថៃបានប្រាប់ទីភ្នាក់ងារព័ត៌មាន Reuters ថាការរំពឹងទទួលបានកំណើនខ្ពស់បែបនេះ ក៏ដោយសារតែកំណើននៃភ្ញៀវទេសចរចិន។
បើតាម Reuters វិស័យទេសចរណ៍ថៃចូលរួមចំណែកដល់ទៅប្រហែល១០ភាគរយនៃផលិតផលក្នុងស្រុកសរុបរបស់ប្រទេសនេះ។
Reuters បានឲ្យដឹងទៀតថាការព្យាករកំណើនចំនួនភ្ញៀវទេសចរបែបនេះ បានកើតឡើងចំពេលដែលប្រទេសថៃរំពឹងទទួលបានភ្ញៀវទេសចដល់ទៅ៣៣លាននាក់នៅក្នុងឆ្នាំដែលជាចំនួនខ្ពស់បំផុតមិនធ្លាប់មាន។
កាលពីឆ្នាំ២០១៥កន្លងមក ថៃទាក់ទាញបានភ្ញៀវទេសចរចិនជិត៨លាននាក់ដែលជាចំនួនខ្ពស់បំផុតមិនធ្លាប់មាន ហើយចំនួនភ្ញៀវទេសចរត្រូវបានអាជ្ញាធរថៃរំពឹងថានឹងកើនឡើងដល់ទៅ១០លាននាក់នៅឆ្នាំនេះ៕
