ប្រធានាធិបតីចិន ស៊ី ជិនពីង បានថ្លែងនៅថ្ងៃនេះថា លោកសង្ឃឹមថាដំណើរទស្សនកិច្ចរបស់ប្រធានាធិបតីហ្វីលីពីន រ៉ូទ្រីហ្កូ ឌូទើតេ ទៅកាន់ប្រទេសចិនអាចជួយកែលម្អយ៉ាងពេញលេញនូវទំនាក់ទំនងដែលខូចខាតដោយសារតែជម្លោះទឹកដីនៅសមុទ្រចិនខាងត្បូង។ នេះដោយយោងតាមសេចក្ដីរាយការណ៍របស់ Reuters។
លោក ឌូទើតេ បានធ្វើដំណើរទៅដល់ក្រុងប៉េកាំងកាលពីថ្ងៃអង្គារកន្លងមក ជាមួយក្រុមធុរជនយ៉ាងតិច ២០០នាក់ ដើម្បីបើកផ្លូវសម្រាប់អ្វីដែលលោកហៅថា សម្ព័ន្ធមិត្តពាណិជ្ជកម្មថ្មី ខណៈដែលទំនាក់ទំនងចាស់វស្សាជាមួយសម្ព័ន្ធមិត្តអាមេរិក កាន់តែអាក្រក់ឡើង។
កាលពីថ្ងៃម្សិលមិញ ដើម្បីអបអរដល់ពលរដ្ឋហ្វីលីពីនរាប់រយនាក់នៅទីក្រុងប៉េកាំង លោក ឌូទើតេ ថ្លែងថា គោលនយោបាយការបរទេសហ្វីលីពីន កំពុងតម្រង់ឆ្ពោះទៅរកចិន។
នៅថ្ងៃម្សិលមិញដែរ បាតុករប្រឆាំងអាមេរិកប្រហែល ១ពាន់ បានប្រមូលផ្ដុំគ្នានៅស្ថានទូតអាមេរិកនៅទីក្រុងម៉ានីល ដោយទាមទារឲ្យដកកងទ័ពអាមេរិក ចេញពីកោះមិនដាណាវ នៅភាគខាងត្បូងហ្វីលីពីន។
ទីភ្នាក់ងារព័ត៌មាន Reuters បានដកស្រង់សម្ដីលោក ស៊ី ដែលបានប្រាប់លោក ឌូទើតេ ថា ចិន និងហ្វីលីពីន គឺជាបងប្អូន ហើយភាគីទាំងពីរអាចដោះស្រាយជម្លោះដោយសមរម្យ៕
