ពលរដ្ឋ​ហ្វីលីពីន​រាប់​លាន​នាក់​កំពុង​ប្រឈម​មុខ​នឹង​ព្យុះ​កំណាច​ហៃម៉ា

ប្រជាជនហ្វីលីពីនរាប់លាននាក់ ត្រូវបានគេព្រមានឲ្យប្រុងប្រយ័ត្នកាលពីថ្ងៃម្សិលមិញ ខណៈព្យុះទីហ្វុងខ្លាំងបំផុតមួយ នឹងវាយបោកបក់លើប្រទេសមួយនេះ ដោយអាជ្ញាធរព្រមានពីខ្យល់ព្យុះដ៏មហន្តរាយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។

AFP បានបន្តថា ព្យុះទីហ្វុងហៃម៉ា បានវាយប្រហារភាគខាងជើងខេត្តខាហ្កាយ៉ាន់ កាលពីយប់មិញ ដោយនាំមកនូវខ្យល់បក់បោកខ្លាំង និងភ្លៀងធ្លាក់ជោគជាំ ដែលសឹងតែមានទំហំដូចទៅនឹងព្យុះហៃយ៉ាន ដែលបានសម្លាប់មនុស្សជាង ៧៣៥០នាក់ កាលពីឆ្នាំ២០១៣កន្លងមក។

ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ ដែលកំពុងស្ថិតនៅទីក្រុងប៉េកាំងក្នុងដំណើរទស្សនកិច្ចរយៈពេល ៤ថ្ងៃនោះ បានថ្លែងថា៖ “យើងបានត្រឹមបួងសួងសូមឲ្យយើងជៀសផុតពីមហន្តរាយដូចពេលកន្លងមក ដែលនាំមកនូវទុក្ខសោកសៅ និងភាពឈឺចាប់។ ប៉ុន្តែ យើងបានត្រៀមខ្លួនរួចហើយ។ គ្រប់យ៉ាងត្រូវបានដាក់ឲ្យប្រុងជើងការ”។

ទីភ្នាក់ងារគ្រប់គ្រងគ្រោះមហន្តរាយរបស់រដ្ឋាភិបាល បានឲ្យដឹងថា ព្យុះហៃម៉ា មានទំហំដល់ទៅ ៨០០គីឡូម៉ែត្រ ដែលធ្វើឲ្យមនុស្សជាង ១០លាននាក់នៅទូទាំងភាគខាងជើងនៃកោះ Luzon ទទួលរងផលប៉ះពាល់។

មន្ត្រីឧតុនិយមហ្វីលីពីន បាននិយាយថា ព្យុះនេះបោកបក់ប្រទេសហ្វីលីពីនក្នុងល្បឿនខ្យល់ ២២៥គីឡូម៉ែត្រក្នុងមួយម៉ោង ហើយល្បឿនខ្យល់ខ្លាំងបំផុតរហូតដល់ទៅ ៣១៥គីឡូម៉ែត្រក្នុងមួយម៉ោង។

ព្យុះនេះ ត្រូវបានគេព្យាករថានឹងឆ្ពោះទៅភាគខាងលិច កាត់តាមតំបន់ភ្នំនៅចុងខាងជើងនៃកោះ Luzon ហើយនឹងបោកបក់នៅថ្ងៃព្រហស្បតិ៍នេះ។ ព្យុះត្រូវបានគេព្យាករថា នឹងបោកបក់សម្ដៅទៅសមុទ្រចិនខាងត្បូងផងដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ