កាលពីថ្ងៃម្សិលមិញ ប្រធានាធីបតីហ្វីលីពីន លោក រ៉ូទ្រីហ្កូ ឌូទើតេ បានថ្លែងថា វាដល់ពេលនិយាយ Goodbye ទៅអាមេរិកហើយ។ នេះដោយយោងតាមសេចក្ដីរាយការណ៍របស់ទីភ្នាក់ងារ AFP។
AFP ថា លោក ឌូទើតេ ថ្លែងដូច្នេះ អំឡុងដំណើរទស្សនកិច្ចរបស់លោកនៅក្នុងប្រទេសចិន ខណៈមេដឹកនាំមាត់ដាច់រូបនេះ កំពុងរៀបចំសម្ព័ន្ធភាពកាទូតប្រទេសឡើងវិញ។
លោក ឌូទើតេ កំពុងស្ថិតក្នុងដំណើរទស្សនកិច្ចរយៈពេល ៤ថ្ងៃនៅប្រទេសចិន ហើយទស្សនកិច្ចនេះ ត្រូវបានគេព្យាករថា នឹងបញ្ជាក់ពីការងាកចេញរបស់លោកពីក្រុងវ៉ាស៊ីងតោន និងសម្រួចទៅរកក្រុងប៉េកាំងវិញ។
អំឡុងថ្លែងសុន្ទរកថាទៅកាន់សហគមន៍ហ្វីលីពីននៅទីក្រុងប៉េកាំង មេដឹកនាំឆេវឆាវរូបនេះ ថ្លែងថា៖ “អ្នកនៅក្នុងប្រទេសខ្ញុំ ដើម្បីប្រយោជន៍ខ្លួនឯងហ្នឹង។ ហេតុនេះ ដល់ពេលលាគ្នាហើយសម្លាញ់។ ខ្ញុំនឹងមិនទៅរកអាមេរិកទៀតទេ”។
លោក ឌូទើតេ ដែលបានចូលកាន់តំណែងកាលពីចុងខែមិថុនាកន្លងមក បានថ្លែងថា លោកឆ្អែតចិត្តនឹងគោលនយោបាយការបរទេសហ្វីលីពីន ដែលស្ថិតក្រោមរបៀបវារៈរបស់លោកខាងលិច៕