តុលាការនឹងបើកសវនាការលើសំណុំរឿង​លោក កឹម សុខា នៅចុងខែតុលានេះ

លោក កឹម សុខា នាពេលកន្លងទៅ

មេធាវីការពារក្តីឲ្យមេដឹកនាំបក្សប្រឆំាងបានឲ្យដឹងថា តុលាការកំពូលនឹងបើកសវនាការសំណុំរឿងលោក កឹម សុខា នៅចុងខែតុលានេះ ពាក់ព័ន្ធនឹងការបដិសេធចូលខ្លួនក្នុងនាមជាសាក្សី ដែលតុលាការចាត់ទុកថាជាបទល្មើសព្រហ្មទណ្ឌជាក់ស្តែង។

លោក កឹម សុខា ត្រូវបានតុលាការក្រុងភ្នំពេញកាត់ទោសឱ្យជាប់ពន្ធនាគារ៥ខែ និងពិន័យប្រាក់៨០ម៉ឺនរៀល ពីបទបដិសេធចូលខ្លួនក្នុងនាមជាសាក្សី ទាក់ទងសំណុំរឿងដែលគេចោទថាលោកមានស្នេហាលួចលាក់។

លោក សំ សុគង់ មេធាវីការពារក្តីឲ្យលោក កឹម សុខា បានប្រាប់ VOD នៅថ្ងៃនេះថា នៅម៉ោង៨ព្រឹក ថ្ងៃទី២៨ ខែតុលាខាងមុខនេះ តុលាការកំពូលនឹងបើកសវនាការសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិ តាមការស្នើសុំរបស់ក្រុមមេធាវីការពារក្តីឲ្យមេដឹកនាំបក្សប្រឆំាងរូបនោះ។

លោក សំ សុគង់ បញ្ជាក់ថា ក្រុមមេធាវីការពារក្តីឲ្យលោក កឹម សុខា នឹងលើកសំណើរទៅតុលាការកំពូលឲ្យពិនិត្យឡើងវិញលើនីតិវិធីនៃការស៊ើបសួររបស់ចៅក្រមស៊ើបសួរ និងព្រះរាជអាជ្ញាសាលាដំបូងរាជធានីភ្នំពេញ ដោយលោកថា ការចោទប្រកាន់កូនក្តីលោកកន្លងមក ធ្វើឡើងដោយខុសនីតិវិធីច្បាប់ ខណៈដែលកូនក្ដីរបស់ខ្លួននៅមានអភ័យឯកសិទ្ធិតំណាងរាស្ត្រ និងមិនបានប្រព្រឹត្តបទល្មើសជាក់ស្តែងនោះទេ។

លោក កឹម សុខា បានស្នាក់នៅក្នុងស្នាក់ការគណបក្សជិត៥ខែមកហើយ បន្ទាប់ពីអាជ្ញាធរប៉ុនប៉ងចាប់ខ្លួនលោកមិនបានសម្រេច កាលពីថ្ងៃទី២៦ខែឧសភាកន្លងមក៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ