ពលករខ្មែរ៣នាក់ដែលជាជនរងគ្រោះនៃការជួញដូរមនុស្សឆ្លងដែន ត្រូវបានក្រសួងការបរទេសកម្ពុជាប្រកាសថា ត្រូវបានបញ្ជូនត្រឡប់មកពីប្រទេសឥណ្ឌូនេស៊ីកាលពីល្ងាចថ្ងៃម្សិលមិញ។
ក្រសួងការបរទេសកម្ពុជា បានបញ្ជាក់ក្នុងសេចក្ដីប្រកាសព័ត៌មានកាលពីថ្ងៃម្សិលមិញថា ពលករខ្មែរទាំង ៣នាក់នោះ ត្រូវបានអាជ្ញាធរឥណ្ឌូនេស៊ី ចាប់ខ្លួនកាលពីថ្ងៃទី១២ ខែកក្កដាកន្លងមកនេះ បន្ទាប់ពីបង្ក្រាបទៅលើទូកនេសាទបរទេសមួយ ដែលបានចូលនេសាទក្នុងដែនទឹកឥណ្ឌូនេស៊ី។
ក្នុងសេចក្ដីប្រកាសព័ត៌មានកាលពីថ្ងៃទី០៧ ខែតុលា ក្រសួងការបរទេសកម្ពុជា បានឲ្យដឹងថា ពលករខ្មែរចំនួន ២០នាក់ កំពុងជាប់ឃុំនៅទីកន្លែងពីរដាច់ដោយឡែកពីគ្នា នៅក្នុងប្រទេសឥណ្ឌូនេស៊ី។
ក្រសួងការបរទេស បានឲ្យដឹងផងដែរ ពលការិនីខ្មែរម្នាក់ទៀត ក៏គ្រោងនឹងមកដល់ប្រទេសកម្ពុជាវិញនៅល្ងាចថ្ងៃនេះដែរ បន្ទាប់ពីពលការិនីរូបនោះ ប្រឈមនឹងការលំបាកនៅអំឡុងពេលធ្វើការស្របច្បាប់នៅប្រទេសម៉ាឡេស៊ី។
តួលេខកត់ត្រាដោយក្រសួងការបរទេសកម្ពុជា បានឲ្យដឹងថា ស្ថានទូត និងស្ថានកុងស៊ុលកម្ពុជានៅឯបរទេស បានជួយសង្គ្រោះ និងបញ្ជូនត្រឡប់មកប្រទេសកំណើតវិញនូវពលរដ្ឋកម្ពុជារងគ្រោះចំនួន ៥៧៨នាក់ នៅក្នុងរយៈពេល ៩ខែក្នុងឆ្នាំ២០១៦នេះ។ តួលេខនោះបង្ហាញថា ពលរដ្ឋខ្មែរភាគច្រើនបំផុត ត្រូវបានជួយសង្គ្រោះ និងបញ្ជូនមកពីប្រទេសជិតខាងកម្ពុជា ក្នុងនោះមានពលរដ្ឋខ្មែរចំនួន ៥៧នាក់ ត្រូវបានជួយសង្គ្រោះពីប្រទេសឥណ្ឌូនេស៊ី៕