មេបញ្ជាការកំពូលផ្នែកអាវុធនុយក្លេអ៊ែរអាមេរិក បាននិយាយកាលពីចុងសប្ដាហ៍នេះថា លោកនឹងជំទាសទៅនឹងប្រធានាធិបតី លោក ដូណាល់ ត្រាំ ប្រសិនបើប្រធានាធិបតីអាមេរិករូបនេះ បញ្ជាឲ្យបាញ់អាវុធនុយក្លេអ៊ែរទាំង «ខុសច្បាប់»។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
លោកឧត្ដមសេនីយ៍ John Hyten មេបញ្ជាការនៃបញ្ជាការដ្ឋានយុទ្ធសាស្ត្រអាមេរិក បានថ្លែងប្រាប់វេទិកាសន្តិសុខអន្តរជាតិនៅកាណាដាថា លោកទទួលបានមតិជាច្រើនជុំវិញអ្វីដែលលោកនឹងឆ្លើយតប ប្រសិនបើរូបលោកទទួលបានបញ្ជាបែបហ្នឹង។
មេបញ្ជាការកងទ័ពអាមេរិករូបនេះ ដែលទទួលខុសត្រូវលើការគ្រប់គ្រងអាវុធនុយក្លេអ៊ែរអាមេរិក បានឆ្លើយតបថា លោកនឹងគោរពតាមបញ្ជា។
ទោះជាយ៉ាងណា លោកអះអាងបន្ថែមថា ប្រសិនបើបញ្ជានោះខុសច្បាប់ លោកនឹងប្រាប់ទៅប្រធានាធិបតីថា នោះគឺជាបញ្ជាខុសច្បាប់។
ថ្មីៗនេះ មានការចោទសួរថា តើមេដឹកនាំអាមេរិក លោក ដូណាល់ ត្រាំ នឹងបញ្ជាឲ្យវាយប្រហារដោយគ្រាប់បែកនុយក្លេអ៊ែរទៅលើប្រទេសកូរ៉េខាងជើង ឬយ៉ាងណា បន្ទាប់ពីក្រុងព្យុងយ៉ាងធ្វើតេស្តគ្រាប់បែកនុយក្លេអ៊ែរ និងគ្រាប់មីស៊ីលជាបន្តបន្ទាប់ ដែលត្រូវបានគេមើលឃើញថា ជាគំរាមកំហែងដល់សន្តិសុខអាមេរិក៕
