រថយន្តធុនធំមួយគ្រឿង បានបើកសម្រុកចូលក្នុងផ្សារគ្រីស្មាស់ដ៏មមាញឹកមួយនៅកណ្ដាលក្រុងប៊ែរឡាំង នៅថ្ងៃនេះ ដោយបានសម្លាប់មនុស្សយ៉ាងតិច ៩នាក់ និងបង្កឲ្យមនុស្សជាង ៥០នាក់ទៀតរងរបួស ដែលប៉ូលិសអាល្លឺម៉ង់និយាយថា អាចជាការវាយប្រហារភេរវកម្ម។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានបន្តថា រថយន្តសង្គ្រោះ និងក្រុមមន្ត្រីប្រដាប់ដោយអាវុធធុនធ្ងន់ បានធ្វើដំណើរយ៉ាងប្រញាប់ប្រញាល់ទៅកាន់តំបន់នោះ បន្ទាប់ពីអ្នកបើកបរម្នាក់ បានបើករថយន្តសម្រុកចូលក្នុងផ្សារសម្បូរទៅដោយភ្ញៀវទេសចរនោះ ដែលធ្វើឲ្យគេនឹកឃើញឡើងវិញនូវទិដ្ឋភាពវាយប្រហារដ៏តក់ស្លុត ដែលបានវាយប្រហារទីក្រុងនីសរបស់ប្រទេសបារាំង កាលពីខែកក្កដាកន្លងមក។
អ្នកនាំពាក្យប៉ូលិសអាល្លឺម៉ង់ បានប្រាប់ AFP ថា បុរសម្នាក់ដែលបានបើកបររថយន្តនោះ ត្រូវបានប៉ូលិសឃុំខ្លួន ចំណែកមនុស្សជិះក្នុងរថយន្តនោះ បានស្លាប់ទៅហើយ។
ខណៈសាក្សីរៀបរាប់ពីទិដ្ឋភាពដ៏តក់ស្លុតនោះ ប៉ូលិសនិយាយថា យ៉ាងហោចមនុស្ស ៩នាក់បានស្លាប់ ហើយ ៥០នាក់ទៀតបានរងរបួស ក្នុងនោះ ៤នាក់រងរបួសធ្ងន់ នៅក្នុងឧប្បត្តិវហេតុនោះ ដែលបានកើតឡើងមិនដល់មួយសប្ដាហ៍ផងមុនពិធីបុណ្យគ្រីស្មាស់មកដល់៕
