រដ្ឋាភិបាលចិនបានផ្តល់ជំនួយជាសម្ភារៈសរុបជាទឹកប្រាក់ជាង១១លានដុល្លាអាមេរិកឲ្យទៅគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប សម្រាប់យកទៅបំរើឲ្យការបោះឆ្នោតឆ្នាំ២០១៧និង២០១៨ខាងមុខនេះ។
សម្ភារៈដែលចិនផ្តល់ឲ្យនោះរួមមាន រថយន្តប្រភេទចម្រុះចំនួន៤៤គ្រឿង ម៉ូតូ២៩គ្រឿង កេសសម្រាប់ដាក់សម្ភារចំនួន២៤០០កេស វិទ្យុទាក់ទង២៤០០គ្រឿង កុំព្យូទ័រលើតុនិងយួរដៃចំនួន៨០គ្រឿង ទូរទស្សន៍១០គ្រឿង តុ កៅអី និងសម្ភារៈមួយចំនួនទៀត ។
បន្ទាប់ពីកម្មវិធីប្រគល់សម្ភារៈនៅព្រឹកថ្ងៃទី២០ ខែធ្នូនេះ ឯកអគ្គរដ្ឋទូតចិនប្រចំាកម្ពុជា លោក ស្យុង ប៉ បានថ្លែងប្រាប់អ្នកសារព័ត៌មានតាមរយៈអ្នកបកប្រែថា «មានតែការបោះឆ្នោតដ៏ត្រឹមត្រូវ ប្រកបដោយតម្លាភាព ទើបធ្វើឲ្យប្រទេសកម្ពុជាមានសន្តិភាព»។
ប្រធាន គ.ជ.ប លោក ស៊ិក ប៊ុនហុក បានថ្លែងថា ក្រោយពីទទួលបានសម្ភារៈដែលចិនផ្តល់ឲ្យនេះថា គ.ជ.ប នឹងយកសំភារៈទាំងនេះទៅប្រើប្រាស់សម្រាប់បំរើឲ្យការបោះឆ្នោតឲ្យចំគោលដៅ ដោយថា ដើម្បីលទ្ធផលបោះឆ្នោតនាពេលខាងមុខ គ្រប់ភាគីនៃគណបក្សនយោបាយដែលចូលរួមប្រគួតប្រជែងទំាងអស់ទទួលយកបានទំាងអស់គ្នា។
ចាប់ពីបោះឆ្នោតឆ្នាំ១៩៩៨ រដ្ឋាភិបាលចិនបានជួយដល់ គ.ជ.ប នូវរថយន្តម៉ាកហ្ស៊ីប២៧គ្រឿង។ ឆ្នាំ២០០៣ផ្តល់នូវសម្ភារៈការិយាល័យ១២ប្រភេទ និងឆ្នាំ២០០៧ ការបោះឆ្នោតជ្រើសរើសក្រុមប្រឹក្សាឃុំ សង្កាត់ចិនជួយជាសម្ភារៈការិយាល័យចំនួន២៧ប្រភេទ ខណៈឆ្នាំ២០១៦ ខែតុលា កន្លងទៅនេះ រដ្ឋាភិបាលចិនក៏បានផ្តល់ជំនួយជាសម្ភារៈដល់ គ.ជ.ប ចំនួន១០មុខម្តងរួចមកហើយ។ ជំនួយទាំងនោះ រួមមាន ម៉ាស៊ីនភ្លើង ១៧០គ្រឿង កុំព្យូទ័រ ៥៥គ្រឿង កុំព្យូទ័រយួរដៃ ៣០គ្រឿង ម៉ាស៊ីនព្រីន ៥៥គ្រឿង មាស៊ីនព្រីនខូល័រ ២០គ្រឿង ម៉ាស៊ីនស្កែន ៤០គ្រឿង ម៉ាស៊ីនបញ្ចាំងស្លាយ ៣៧គ្រឿង ផ្ទាំងក្រណាត់បញ្ចាំងស្លាយ ៣៧គ្រឿង ម៉ាស៊ីនហ្វូតូកូពី ២គ្រឿង និងឧបករណ៍បំពងសំឡេង ៨គ្រឿង។
គួរបញ្ជាក់ថា ចាប់តាំងពីដំណើរការងារដំបូងរបស់ខ្លួន គ.ជ.ប ពឹងផ្អែកយ៉ាងខ្លាំងលើជំនួយបច្ចេកទេសនិងសម្ភារៈបានមកពីសហភាពអឺរ៉ុបនិ ងជប៉ុនដើម្បីរៀបចំបញ្ជីឈ្មោះបោះឆ្នោតឆ្នាំ២០១៦៕