ប៉ូលិសតួកគីម្នាក់ បានបាញ់សម្លាប់អគ្គរដ្ឋទូតរុស្ស៊ីប្រចាំប្រទេសតួកគី នៅទីក្រុងអង់ការ៉ា នៅថ្ងៃនេះ ដែលជំរុញឲ្យមានការប្ដេជ្ញាពីប្រធានាធិបតីរុស្ស៊ី ក្នុងការបង្កើនការប្រយុទ្ធប្រឆាំងនឹង “អំពើភេរវកម្ម”។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
បើតាម AFP ប៉ូលិសដែលជាខ្មាន់កាំភ្លើងរូបនោះ បានស្រែកខ្លាំងថា “អាឡិបប៉ូ” និង “អាឡូហ៊ូ អាក្បារ” បន្ទាប់ពីគេបានបាញ់ទៅលើលោក Andrei Karlov នៅក្នុងមជ្ឈមណ្ឌលពិព័រណ៌មួយក្នុងទីក្រុងអង់ការ៉ា។ អំពើហិង្សានេះ បានកើតឡើងនៅចំពេលមានជំនួបនៅទីក្រុងមូស្គូ រវាងរដ្ឋមន្ត្រីការបរទេសរុស្ស៊ី និងប្រមុខកាទូតតួកគី ស្ដីពីវិបត្តិស៊ីរី។
រូបភាពដ៏តក់ស្លុត បានបង្ហាញនូវទិដ្ឋភាពខ្មាន់កាំភ្លើងបាញ់ប្រហារទៅលើអ្នកកាទូតជើងចាស់រូបនេះពីខាងក្រោយ ខណៈលោកបើកកម្មវិធីពិព័រណ៌រូបថតរុស្ស៊ី។
រូបថតបង្ហាញថា អគ្គរដ្ឋទូតរូបនោះកំពុងឈរថ្លែងនៅឯតុឈរមួយ មុននឹងដួលដេកទៅលើកម្រាលឥដ្ឋ ខណៈពេលសំឡេងកាំភ្លើងបានផ្ទុះឡើង៕
