ទីភ្នាក់ងារអង្គការសហប្រជាជាតិ បាននិយាយថា មនុស្សរហូតដល់ ១ម៉ឺន ៥ពាន់នាក់ បានរត់ភៀសចេញពីព្រំដែនភូមា ចូលទៅក្នុងប្រទេសចិនកាលពីខែវិច្ឆិកាកន្លងមកនេះ ខណៈដែលការប្រយុទ្ធគ្នារវាងកងទ័ពភូមា និងក្រុមប្រដាប់អាវុធជនជាតិភាគតិច កាន់តែតានតឹងឡើង។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
លោក Pierre Peron អ្នកនាំពាក្យការិយាល័យអង្គការសហប្រជាជាតិទទួលបន្ទុកសម្របសម្រួលកិច្ចការមនុស្សធម៌នៅភូមា បានប្រាប់ Reuters តាមអ៊ីម៉ែលថា ការផ្ដល់ជំនួយទៅដល់មនុស្សរងផលប៉ះពាល់ពីជម្លោះនេះ កាន់តែមានស្ថានភាពអាក្រក់ឡើង។
ទីភ្នាក់ងារនេះ បាននិយាយថា ជនភៀសខ្លួនថ្មីប្រហែល ១ម៉ឺន ៥ពាន់នាក់ និងមនុស្ស ២៤០០នាក់ទៀត បានភៀសខ្លួននៅក្នុងស្រុក នៅភាគខាងជើងនៃរដ្ឋសានរបស់ភូមា ចាប់តាំងពីថ្ងៃទី២០ ខែវិច្ឆិកាកន្លងមក នៅពេលសម្ព័ន្ធកងទ័ពបះបោរ ៤ក្រុម បានវាយប្រហារទៅលើប៉ុស្តិ៍ប៉ូលិស និងយោធា។
ការវាយប្រហារនេះ បានកាត់ផ្ដាច់ពាណិជ្ជកម្មឆ្លងកាត់ព្រំដែន ហើយចិនបង្ហាញក្ដីបារម្ភចំពោះការបាញ់គ្រាប់ផ្លោងចូលទឹកដីខ្លួន។
ជម្លោះប្រដាប់អាវុធ និងការភៀសខ្លួនរបស់ប្រជាជន បានធ្វើឲ្យអន្តរាយដល់ក្ដីសង្ឃឹមរបស់អ្នកស្រី អ៊ុងសាន ស៊ូជី ក្នុងការបង្កើតសន្តិភាពនៅតាមតំបន់ព្រំដែន៕
