មេដឹកនាំប្រទេសតួកគី និងសហភាពអឺរ៉ុបបានប្រមូលផ្ដុំគ្នានៅទីក្រុងព្រុចសែល ប្រទេសបែលហ្សិក សម្រាប់កិច្ចប្រជុំកំពូលជាបន្ទាន់មួយស្តីពីការដោះស្រាយវិបត្តិជនភៀសខ្លួនដែលអាក្រក់បំផុតនៅអឺរ៉ុបចាប់តាំងពីសង្គ្រាមលោកលើកទីពីរមក។
បណ្ដាញផ្សាយព័ត៌មាន BBC រាយការណ៍ថា សហភាពអឺរ៉ុបបានសន្យាផ្ដល់ប្រាក់៣ពាន់លានអ៊ឺរ៉ូ (៣,៣ពាន់លានដុល្លារ) ទៅឲ្យប្រទេសតួកគីសម្រាប់ការផ្ដល់ការស្នាក់នៅដល់ជនចំណាកស្រុកទាំងនោះ និងបញ្ឈប់លំហូរចូលរបស់ពួកគេ។
កាលពីឆ្នាំមុន ជនភៀសខ្លួនជាងមួយលាននាក់បានចូលទៅសហភាពអឺរ៉ុបដោយខុសច្បាប់តាមទូកដោយភាគច្រើននៃពួកគេធ្វើដំណើរចេញពីប្រទេសតួកទៅកាន់ប្រទេសក្រិក។
ជនភៀសខ្លួនប្រមាណ១៣ ០០០នាក់បានជាប់គាំងនៅតាមព្រំដែនរបស់ប្រទេសក្រិក ដោយសារបណ្ដាប្រទេសនៅក្នុងសហភាពអ៊ឺរ៉ុបបានរឹតបន្តឹងការឆ្លងដែនទៅកាន់ទឹកដីរបស់ខ្លួន។
អង្គការណាតូកំពុងពង្រីកបេសកកម្មរបស់កងនាវាចររបស់ខ្លួនប្រឆាំងនឹងការរត់ពន្ធមនុស្សនៅសមុទ្រ Aegean ដើម្បីគ្របដណ្តប់ដល់ទឹកដីតួកគី និងក្រិក ហើយក៏នឹងបង្កើនកិច្ចសហប្រតិបត្ដិការរបស់ខ្លួនជាមួយទីភ្នាក់ងារព្រំដែនរបស់សហភាពអឺរ៉ុប Frontex នៅក្នុងតំបន់នេះផងដែរ។
ជនចំណាកស្រុកដែលភាគជាច្រើនភៀសខ្លួនចេញពីតំបន់សង្រ្គាមនៅប្រទេសស៊ីរី និងអ៊ីរ៉ាក់នៅតែបន្ត ធ្វើដំណើរប្រកបដោយគ្រោះថ្នាក់ពីប្រទេសតួកគីទៅកាន់កោះខាងក្រៅនៃប្រទេសក្រិក។
វិបត្តិនៃជនភៀសខ្លួននេះបានបង្កឲ្យមានមនុស្សបាត់បង់ជីវិតជាថ្មីម្តងទៀតកាលពីថ្ងៃអាទិត្យ នៅពេលដែលទូកមួយបានលិចបណ្ដាលឲ្យមនុស្ស២៥នាក់ស្លាប់។
អង្គការទេសន្តប្រវេសន៍អន្តរជាតិបានរាយការណ៍ថា យ៉ាងតិចជនចំណាកស្រុក៣២១បានលង់ទឹកស្លាប់នៅចន្លោះថ្ងៃទី១ ខែមករា ដល់ថ្ងៃទី៣ ខែមីនា ឆ្នាំ២០១៦ នៅពេលពួកគេព្យាយាមធ្វើដំណើរទៅកាន់ប្រទេសក្រិក៕
ប្រភព៖ BBC
