ប្រធានាធិបតីស៊ីវិលរបស់មីយ៉ាន់ម៉ាដែលឈ្នះការបោះឆ្នោតកាលពីខែវិច្ឆិកាឆ្នាំ២០១៥កន្លងទៅបានស្បថចូលកាន់តំណែងនៅព្រឹកនេះដែលជាព្រឹត្តិការណ៍ប្រវត្តិសាស្ត្រជាង៥ទសវត្សរ៍មកមិនធ្លាប់មាន របស់ប្រទេសនេះ។
លោក Htin Kyaw ជាអតីតជំនួយការរបស់ស្រី អ៊ុង សានស៊ូជី ត្រូវបានជ្រើសតាំងជាប្រធានាធិបតីបន្ទាប់ពីលោកស្រី អ៊ុង សានស៊ូជី មេដឹកនាំគណបក្សសម្ព័ន្ធជាតិដើម្បីលទ្ធិប្រជាធិបតេយ្យត្រូវរដ្ឋធម្មនុញ្ញដែលបង្កើតឡើងដោយរដ្ឋាភិបាលយោធារារាំងមិនឲ្យលោកស្រីក្លាយជាប្រធានាធិបតី។
លោក Htin Kyaw ស្បថចូលកាន់តំណែងនៅថ្ងៃព្រឹកថ្ងៃពុធនេះជំនួសតំណែងលោក ថេន សេន ជាអតីតប្រធានធិបតីពាក់កណ្តាលយោធា។ នេះបើតាមសារព័ត៌មាន Channel News Asia។
លោក Htin Kyaw បច្ចុប្បន្នមានអាយុ៦៩ឆ្នាំ ធ្លាប់ទទួលការអប់រំនៅក្នុងប្រទេសអង់គ្លេស ហើយឪពុករបស់លោកជាអ្នកតែងនិពន្ធនោះបានជាប់ជាតំណាងរាស្ត្រកាលពីការបោះឆ្នោតនៅឆ្នាំ១៩៩០។
មីយ៉ាន់ម៉ាជាប្រទេសនៅអាស៊ីអាគ្នេយ៍ដែលមានប្រជាជន៥១លាននាក់ត្រូវគេរំពឹងថានឹងមានការប្រែប្រួសសេដ្ឋកិច្ចពីភាពដុនដាបក្នុងរបបយោធាគ្រប់គ្រងទៅរកភាពរីកចម្រើនក្នុងពិភពលោកពេលដែលរដ្ឋាភិបាលស៊ីវិលថ្មីចូលដឹកនាំតាមទម្រង់នៃលទ្ធិប្រជាធិបតេយ្យនិងការគោរពសិទ្ធិមនុស្ស៕
