រដ្ឋាភិបាលប្រកាសឲ្យទុកតំបន់ព្រៃយ៉ាងតិចចំនួន៥កន្លែងទៀត នៅតាមបណ្តាខេត្តមួយចំនួន ទុកជាតំបន់អភិរក្ស បន្ទាប់ពីរកឃើញថា បទល្មើសព្រៃឈើនូវតែបន្តកើតមាន។
នៅសប្តាហ៍នេះ នាយករដ្ឋមន្ត្រីបានប្រកាសឲ្យទៅក្រសួងអប់រំយុវជន និងកីឡា ប្រើប្រាស់ឈើប្រមាណជា៤ម៉ឺនម៉ែតគូបសម្រាប់ជាប្រយោជន៍សាធារណៈ ដែលរដ្ឋាភិបាលថា ឈើទាំងនោះរឹបអូសបានពីបទល្មើសព្រៃឈើ តាមរយៈការចុះបង្ក្រាប គណៈកម្មការពិសេសរបស់ខ្លួនដែលបានបង្កើតឡើងកាលពីពាក់កណ្តាលខែមករាឆ្នាំ២០១៦។
សេចក្តីប្រកាសព័ត៌មានចុះថ្ងៃទី១ខែមេសា ក្រសួងបរិស្ថាន បញ្ជាក់ថា តំបន់ព្រៃ៥កន្លែងនោះមាន តំបន់ព្រៃឡង ព្រៃច្រករបៀងក្រវាញខាងត្បូង ព្រៃព្រះរកា ព្រៃសៀមប៉ាងលិច និងព្រៃវើនសៃ សរុបជាផ្ទៃដីមានជិត១០ម៉ឺនហិកតា(៩៥០០០០)។
ព្រៃឡង់មានព្រំប្រទល់ជាប់នឹងខេត្តចំនួន៤ គឺខេត្តកំពង់ធំ ព្រះវិហារ ស្ទឹងត្រែង និងខេត្តក្រចេះ ចំណែកព្រៃព្រះរកា ស្ថិតក្នុងខេត្តព្រះវិហាជា ជាព្រៃការពារដោយជនជាតិដើមភាគតិចគួយ។
ព្រៃទាំងនោះ ត្រូវបានសហគមន៍អះអាងថា កំពុងរងការបាប់បំផ្លាញពីក្រុមហ៊ុន និងមន្ត្រីខិលខូចមួយចំនួនដែលពួកគេថា អាជ្ញាធរពាក់ព័ន្ធមិនអាចទប់ស្កាត់បាន។
យ៉ាងណាក៏ដោយតំបន់ព្រៃឡង់ ត្រូវរដ្ឋាភិបាលប្រកាសដកហូតយកដីសម្បាទានសេដ្ខកិច្ចទាំងអស់ពីក្រុមហ៊ុនវិញ នៅពេលដែលរដ្ឋាភិបាលប្រកាសឲ្យយកតំបន់នោះ ធ្វើជាតំបន់ការពារនិងអភិរក្សា។