យ៉ាងហោចណាស់មនុស្ស១២នាក់ស្លាប់និងជាច្រើននាក់ទៀតបាត់ខ្លួនដោយសារការបាក់ដីនៅកន្លែងជីកអណ្តូងយករ៉ែនៅភាគខាងជើងនៃប្រទេសមីយ៉ាន់ម៉ានៅយប់ថ្ងៃចន្ទម្សិលមិញនេះ។
អាជ្ញាធរដែនដីបានឲ្យដឹងថាកាលពីយប់ថ្ងៃចន្ទម្សិលមិញបាក់អណ្តូងជីកយករ៉ែថ្មើមថ្មមានតម្លៃរាប់ពានលានដុល្លារនៅក្នុងក្រុងប៉ាកាន នៅក្នុងរដ្ឋកាជីន គឺបាក់បន្ទាប់ពីមានភ្លៀងមួយមេធំ។ នេះបើតាមសារព័ត៌មានChannel News Asia ។
សាកសពចំនួន១២គេរកឃើញនៅក្រោមកំទេចដីនិងជញ្ជាំង ហើយមនុស្សជាច្រើនទៀតនៅបាត់ខ្លួនក្រុមជួយសង្គ្រោះកំពុងបន្តស្វែងរក។ ទោះយ៉ាងណាមន្ត្រីនគរបាលបញ្ជាក់ថាពួកគេពិបាកក្នុងការជួយសង្គ្រោះ ដោយសារមានការភ្លៀងជាថ្មី ហើយមានបាក់ដីបន្ថែមទៀត។
នៅត្រឹមថ្ងៃអង្គារនេះសមត្ថកិច្ចរកឃើញអ្នករងរបួសចំនួន១៥នាក់និងមនុស្សប្រមាណ៣០នាក់ទៀតកំពុងបាត់ខ្លួន៕