ស្ថាបនិកមន្ទីរពេទ្យគន្ធបុប្ផា​បង្ហាញ​ការ​ខក​ចិត្ត​ចំពោះ​រដ្ឋាភិបាល​ស្វីស

លោក Beat Richner ស្ថាបនិក​មន្ទីរពេទ្យ​គន្ធបុប្ផា (រូបថតពីហ្វេសប៊ុក​របស់​លោក​)

ស្ថាបនិក និងជាប្រធានមន្ទីរពេទ្យគន្ធបុប្ផា លោកវេជ្ជបណ្ឌិត Beat Richner បានបង្ហាញការខកចិត្តនឹងរដ្ឋាភិបាលស្វីស ដែលមិនបង្កើនវិភាគទាន ៤លានដុល្លារ សម្រាប់ដំណើរការនៃមន្ទីរពេទ្យនេះនោះឡើយ ខណៈពលរដ្ឋកម្ពុជាកាន់តែច្រើន បានស្វែងរកសេវាសុខាភិបាលនៅមន្ទីរពេទ្យមួយនេះ។

នៅក្នុងលិខិតមួយដែលត្រូវបានបង្ហោះនៅលើទំព័រហ្វេសប៊ុករបស់លោក លោកវេជ្ជបណ្ឌិត Beat Richner ឲ្យដឹងថា រដ្ឋាភិបាលកម្ពុជា បានបង្កើនវិភាគទានថវិកាដល់មន្ទីរពេទ្យមួយនេះ ពីចំនួន ៣លានដុល្លារ ដល់ទៅ ៦លានដុល្លារ។ ចំណែករដ្ឋាភិបាលស្វីស ពុំបានបង្កើនថវិកាវិភាគទានចំនួន ៤លានដុល្លារនោះឡើយ ដែលបញ្ហានេះបានធ្វើឲ្យលោកខកចិត្ត។

កាលពីខែមីនាកន្លងមក រដ្ឋាបាលកម្ពុជា និងស្វីស បានចុះហត្ថលេខាបន្តកិច្ចព្រមព្រៀងស្ដីពីកិច្ចសហប្រតិបត្ដិការបច្ចេកទេស ហិរញ្ញវត្ថុ និងជំនួយមនុស្សធម៌ ដែលក្នុងនោះមានការផ្តល់ជំនួយដល់មន្ទីរពេទ្យគន្ធបុប្ផាផងដែរ។

បើតាមក្រសួងការបរទេសកម្ពុជា រដ្ឋាភិបាលស្វីសបានជួយគាំទ្រដល់មន្ទីរពេទ្យគន្ធបុប្ផា នូវថវិកាសរុបចំនួន ៥៥លានដុល្លារអាមេរិក ចាប់តាំងពីឆ្នាំ១៩៩៤មក។

លោក Beat Richner បានឲ្យដឹងថា កុមារកម្ពុជាជិតកន្លះលាននាក់ បានទទួលសេវាសុខាភិបាល ព្យាបាល និងវះកាត់នៅក្នុងមន្ទីរពេទ្យនេះ ខណៈស្ត្រីមានផ្ទៃពោះជាង ១សែននាក់ ក៏ទទួលបានការពិនិត្យ ព្យាបាល និងសម្រាលកូន នៅមន្ទីរពេទ្យគន្ធបុប្ផាទី ៣ នៅឯខេត្តសៀមរាបផងដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ