ប្រធានាធិបតីទួគី លោក តាយីប អឺដូហ្គេន បានថ្លែងកាលពីថ្ងៃម្សិលមិញថា ប្រទេសទួគីនឹងបិទសាលាបណ្ដុះបណ្ដាលយោធារបស់ខ្លួន និងដាក់កងកម្លាំងប្រដាប់អាវុធ ឲ្យស្ថិតក្រោមបញ្ជារបស់រដ្ឋមន្ត្រីក្រសួងការពារជាតិ។
ទីភ្នាក់ងារព័ត៌មាន Reuters បានផ្សាយថា វាគឺជាការសម្រេចរបស់លោក អឺដូហ្គេន ដើម្បីនាំយកកងទ័ពដាក់នៅក្រោមការគ្រប់គ្រងដ៏តឹងរឹងពីរដ្ឋាភិបាល បន្ទាប់ពីការប៉ុនប៉ងធ្វើរដ្ឋប្រហារមិនបានសម្រេច។
ការផ្លាស់ប្ដូរនេះ បានកើតឡើង បន្ទាប់ពីបុគ្គលិកយោធាជាង ១៧០០នាក់ ត្រូវបានបណ្ដេញចេញនៅសប្ដាហ៍នេះ ដោយសារតែតួនាទីរបស់ពួកគេជាប់ពាក់ព័ន្ធនឹងរដ្ឋប្រហារមិនបានសម្រេច កាលពីថ្ងៃទី១៥ និង១៦ ខែកក្កដាកន្លងមកនេះ។
លោក អឺដូហ្គេន បានថ្លែងក្នុងកិច្ចសម្ភាសមួយកាលពីសប្ដាហ៍មុនថា ពួកយោធា ដែលជាកងទ័ពធំបំផុតរបស់សម្ព័ន្ធណាតូនោះ ត្រូវការឈាមថ្មី។ ក្នុងចំណោមទាហានត្រូវបានបណ្ដេញចេញនោះ ៤០ភាគរយ គឺជាឧត្ដមសេនីយ៍របស់ប្រទេសនេះ។
ប្រទេសទួគី បានចោទប្រកាន់បុព្វជិ Fethullah Gulen ថាជាមេខ្លោងនៃរដ្ឋប្រហារនេះ ដែលបណ្ដាលឲ្យមនុស្ស ២៣៧នាក់ស្លាប់ ហើយជាង ២ពាន់នាក់រងរបួស៕
