ប្រធានាធិបតីឥណ្ឌូនេស៊ី លោក Joko Widodo នៅថ្ងៃពុធនេះប្រកាសរុះរើគណៈរដ្ឋមន្ត្រី ដែលនេះរុះរើពីរលើកហើយក្នុងរយៈមិនដល់ពីរឆ្នាំនៃការដឹកនាំរបស់លោក ក្រោមហេតុផលដើម្បីពង្រឹងប្រសិទ្ធិភាពការងារ។
លោក Widodo បញ្ជាក់ថាការរុះរើនេះគឺដើម្បីបង្កើនប្រសិទ្ធិភាពការងារ។ តាមគម្រោងលោកស្រី Sri Mulyani Indrawati ដែលបច្ចុប្បន្នជានាយកគ្រប់គ្រងធនាគារពិភពលោកនឹងត្រូវដាក់ឲ្យកាន់តំណែងជារដ្ឋមន្ត្រីថ្មីកាន់ក្រសួងសេដ្ឋកិច្ចនិងហិរញ្ញវត្ថុអតីតអគ្គមេបញ្ជាការយោធាលោក Wiranto នឹងជំនួសកន្លែងលោក Luhut Pandjaitan រដ្ឋមន្ត្រីទទួលបន្ទុកការងារសន្តិសុខជាតិ។
ការរុះរើនេះក៏មានការដូររដ្ឋមន្ត្រីក្រសួងផ្សេងៗទៀតដូចជាក្រសួងផែនការនិងការអភិវឌ្ឍជាតិ ក្រសួងពាណិជ្ជកម្ម ក្រសួងឧស្សាហកម្ម និងក្រសួងកិច្ចការដែនសមុទ្រផងដែរ។
លោក Widodo លើកទឹកចិត្តឲ្យមន្ត្រីមកពីគណបក្សផ្សេងៗរួមទាំងគណបក្សប្រឆាំងផងឲ្យចូលរួមនិងគាំទ្រសហការជាមួយគណបក្សកាន់អំណាចក្នុងការអភិវឌ្ឍ។
លោកបានតែងតាំងលោក Airlangga Hartarto មកពីគណបក្ស Golkar ឲ្យទទួលតំណែងជារដ្ឋមន្ត្រីក្រសួងឧស្សាហកម្ម។ លោក Asman Abnur មកពីគណបក្ស National Mandate តែងតាំងឲ្យធ្វើជារដ្ឋមន្ត្រីក្រសួងរដ្ឋបាលនិងកំណែទម្រង់ការិយាល័យធិបតេយ្យ។
គណៈរដ្ឋមន្ត្រីថ្មីនឹងចាប់ផ្តើមដំណើរការនៅថ្ងៃពុធសប្តាហ៍ក្រោយនឹងរួមបញ្ចូលសមាសភាពមកពីគណបក្សផ្សេងៗផង៕