វិស័យឯកជនថៃរំពឹងថាតម្លៃពាណិជ្ជកម្មឆ្លងកាត់ព្រំដែនរបស់ប្រទេសថៃនឹងកើនឡើង១៥ភាគរយនៅឆ្នាំនេះ។
កាសែតបាងកកប៉ុស្តិ៍របស់ថៃបានដកស្រង់សម្ដីអនុប្រធានសភាពាណិជ្ជកម្មថៃ លោក Niyom Wairatpanich ដែលបាននិយាយថា វិស័យឯកជនមានទំនុកចិត្តយ៉ាងខ្លាំងថា តម្លៃពាណិជ្ជកម្មនឹងកើនឡើងដល់១.៧ពាន់ពាន់លានបាតឬជិត៥ពាន់លានដុល្លារ។
ពាណិជ្ជកម្មព្រំដែនរបស់ប្រទេសថៃជាធម្មតាមានការដោះដូរទំនិញជាមួយបណ្ដាប្រទេសជិតខាង។
មន្ត្រីថៃរូបនេះបានថ្លែងបន្ថែមទៀតថាទិដ្ឋភាពពាណិជ្ជកម្មឆ្លងកាត់ព្រំដែនត្រូវបានគេរំពឹងថាកើនឡើង នៅពេលផែនការកសាងតំបន់ពាណិជ្ជកម្មពិសេសរបស់រដ្ឋាភិបាលចាប់ផ្ដើមឡើង។
ការអភិវឌ្ឍតំបន់ពាណិជ្ជកម្មពិសេសគឺជាគោលនយោបាយដ៏សំខាន់មួយ ដែលមានបំណងជំរុញការវិនិយោគ និងពាណិជ្ជកម្មនៅតំបន់ព្រំដែន។ រដ្ឋាភិបាលថៃបានសម្រេចកាលពី២ឆ្នាំមុនបង្កើតតំបន់សេដ្ឋកិច្ចពិសេសនៅតាមបណ្ដាខេត្តចំនួន១០ សម្រាប់បម្រើឲ្យវិស័យកសិកម្ម ឧស្សាហកម្ម ដឹកជញ្ជូន និងទេសចរណ៍។
យោងតាមក្រុមប្រឹក្សាភិបាលសេដ្ឋកិច្ចជាតិនិងអភិវឌ្ឍន៍សង្គមបានឲ្យដឹងថា ការវិនិយោគកំពុងហូរទៅកាន់តំបន់សេដ្ឋកិច្ចពិសេសរបស់រដ្ឋាភិបាលជាមួយគម្រោង៣៩មានតម្លៃ៧.២ពាន់លានបាត៕