ក្រសួងការបរទេសជប៉ុន បាននិយាយថា ប្រទេសជប៉ុន បានតវ៉ាទៅចិនកាលពីថ្ងៃសុក្រម្សិលមិញ បន្ទាប់ពីនាវាល្បាត និងទូកនេសាទចិន បានចូលទៅក្នុងដែនទឹកដែលជប៉ុនចាត់ទុកជាដែនទឹករបស់ខ្លួន នៅប្រជុំកោះមានជម្លោះ។
ក្រុងប៉េកាំង បានអះអាងជាម្ចាស់ទៅលើប្រជុំកោះគ្មានមនុស្សរស់នៅ និងគ្រប់គ្រងដោយជប៉ុន នៅក្នុងសមុទ្រចិនខាងកើត ដែលជប៉ុនហៅកោះនោះថា កោះសេនកាគូ ហើយចិនហៅថា ដាវយួ។ ជារឿយៗ ចិនតែងតែបញ្ជូននាវាល្បាតរបស់ខ្លួនទៅជិតប្រជុំកោះនោះ។
ទីភ្នាក់ងារព័ត៌មាន Reuters បានដកស្រង់សម្ដីមន្ត្រីក្រសួងការបរទេសម្នាក់ ដែលបាននិយាយថា ប៉ុន្តែ នេះគឺជាលើកដំបូងហើយដែលនាវាល្បាត និងទូកនេសាទចិន បានបើកបររួមគ្នាចូលក្នុងតំបន់នោះ ដែលហាក់ដូចជាការបង្កើនសិទ្ធិទៅលើកោះនោះ។
អនុរដ្ឋមន្ត្រីការបរទេសជប៉ុន លោក Shinsuke Sugiyama បានបញ្ជូនលិខិតតវ៉ាដ៏ខ្លាំងក្លាមួយ ទៅអគ្គរដ្ឋទូតចិនប្រចាំប្រទេសជប៉ុន លោក ឆេង យ៉ុងហួ។
ប្រទេសចិន កាលពីថ្ងៃសុក្រម្សិលមិញ ក៏បានចោទប្រកាន់រដ្ឋមន្ត្រីការពារជាតិថ្មីរបស់ជប៉ុន លោកស្រី Tomomi Inada ថាបាននិយាយខុសពីប្រវត្តិសាស្ត្រសង្គ្រាម បន្ទាប់ពីលោកស្រីបដិសេធនិយាយថា កងទ័ពជប៉ុនប្រព្រឹត្តអំពើសម្លាប់រង្គាលលើជនស៊ីវិលចិន នៅអំឡុងសង្គ្រាមលោកលើកទី ២។
ទំនាក់ទំនងចិន និងជប៉ុន ដែលសុទ្ធតែជាមហាអំណាចសេដ្ឋកិច្ចនោះ បានធ្លាក់ចុះដុនដាបដោយសារតែជម្លោះដែនទឹក និងកេរ្តិ៍ដំណែលប្រវត្តិសាស្ត្រដ៏ជូរចត់រវាងប្រទេសទាំងពីរ៕