ក្រុមរដ្ឋអាជ្ញាក្រុងសេអ៊ូលជឿថាកូរ៉េខាងជើងបានជ្រៀតចូលក្នុងគណនីអ៊ីម៉ែលមន្ត្រីរដ្ឋាភិបាលកូរ៉េខាងត្បូងជាច្រើននាក់នៅឆ្នាំនេះ ដែលជាការវាយប្រហារទៅលើប្រព័ន្ធអ៊ីនធឺណិតថ្មីបំផុតពីសំណាក់ក្រុងព្យុងយ៉ាង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ដោយបានដកស្រង់សេចក្ដីរាយការណ៍ពីទីភ្នាក់ងារព័ត៌មាន Yonhap ទីភ្នាក់ងារព័ត៌មាន AFP បានផ្សាយថាការស៊ើបអង្កេតបានបង្ហាញថាលេខសម្ងាត់របស់មនុស្ស៥៦នាក់ក្នុងនោះមានទាំងមន្ត្រីនៅក្រសួងការបរទេស ក្រសួងការពារជាតិ និងក្រសួងបង្រួបបង្រួម ត្រូវបានក្រុមរបស់កូរ៉េខាងជើងលួចយកបាននៅចន្លោះខែមករា ដល់ខែមិថុនាកន្លងមក។
ទីភ្នាក់ងារ Yonhab បានរាយការណ៍ថាក្រុមអ្នកលួចព័ត៌មានតាមអ៊ិនធឺណិតបានបង្កើតវេបសាយក្លែងបន្លំចំនួន ២៧តាមរយៈការប្រើប្រាស់សេវាកម្មបង្ហោះវេបសាយដោយឥតគិតថ្លៃកាលពីខែមករានិងបង្ហោះវេបសាយនានា ដែលដាក់ថាដំណើរការដោយក្រសួងការបរទេស សាកលវិទ្យាល័យ និងក្រុមហ៊ុនពាក់ព័ន្ធនឹងក្រសួងការពារជាតិ ដើម្បីលួចលេខសម្ងាត់។
ការស៊ើបអង្កេតមួយកំពុងតែដំណើរការដើម្បីរកឲ្យឃើញថាតើព័ត៌មានសម្ងាត់អាចត្រូវបានគេទម្លាយឬយ៉ាងណា៕