ប្រធានាធិបតីហ្វីលីពីនចុចឈ្មោះចំៗមន្ត្រីធំៗពាក់ព័ន្ធនឹងគ្រឿងញៀនខុសច្បាប់

ប្រធានាធិបតីហ្វីលីពីន លោក Rodrigo Duterte (រូបភាពពីបណ្តាញសារព័ត៌មាន​Channel News Asia)

ប្រធានាធិបតីហ្វីលីពីន លោក Rodrigo Duterte នៅថ្ងៃអាទិត្យនេះ បានបញ្ចេញឈ្មោះមន្ត្រីប្រហែល ១៦០នាក់ ក្នុងនោះមានអតីតអភិបាលក្រុង និងក្រុមប្រឹក្សាក្រុង ចៅក្រម និងប៉ូលិស ដែលមានជាប់ពាក់ព័ន្ធនឹងការជួញដូរគ្រឿងញៀនខុសច្បាប់។

ទីភ្នាក់ងារព័ត៌មាន Reuters បានផ្សាយថា នេះគឺជាការបង្កើនយុទ្ធនាការសង្គ្រាមគ្រឿងញៀនរយៈពេល ៥សប្ដាហ៍របស់លោក។

Reuters បានដកស្រង់សម្ដីលោក Duterte ដែលបានអានឈ្មោះមនុស្សទាំងឡាយ ដែលលោកនិយាយថា «បានបំផ្លាញប្រទេស»។ លោកថ្លែងដូច្នេះនៅអំឡុងពេលលោកធ្វើដំណើរទៅទស្សនកិច្ចនៅមូលដ្ឋានយោធា ស្ថិតនៅស្រុកកំណើតរបស់លោក នៅទីក្រុង Davao។

បញ្ជីឈ្មោះនោះ មានទាំងឧត្ដមសេនីយ៍ប៉ូលិស ២នាក់ ក្នុងចំណោមឧត្ដមសេនីយ៍ ៥នាក់ ដែលលោក Duterte បានបង្ហាញឈ្មោះកាលពីខែមុន ដោយចាត់ទុកជាអ្នកការពារឈ្មួញជួញដូរគ្រឿងញៀន និងចៅហ្វាយក្រុងម្នាក់ ដែលទើបតែសារភាពកាលពីពេលថ្មីៗនេះ។

លោក Duterte ដែលបានឡើងតំណែងប្រធានាធិបតីបន្ទាប់ពីឈ្នះការបោះឆ្នោតភ្លូកទឹកភ្លូកដីនោះ បានថ្លែងថា៖ «អ្នកឯងគឺជាអ្នកអនុវត្តច្បាប់ ហើយអ្នកឯងអនុញ្ញាតឲ្យអ្នកដទៃប្រើខ្លួនឯង»។

លោក Duterte ពុំបាននិយាយថា នឹងចាត់ការដូចម្ដេចចំពោះមនុស្សទាំងនោះទេ។ ប៉ុន្តែ ប៉ុន្មានម៉ោងក្រោយមក អភិបាលក្រុង ២នាក់ ដែលមានឈ្មោះនៅលើបញ្ជីនោះ បានប្រគល់ខ្លួនឲ្យប៉ូលិស ដោយបដិសេធការជាប់ពាក់ព័ន្ធនឹងការជួញដូរគ្រឿងញៀន។

កាលពីសប្ដាហ៍មុន អភិបាលក្រុង ៣នាក់ មកពីតំបន់មូស្លីម ស្ថិតនៅកោះមិនដាណាវ ភាគខាងត្បូងហ្វីលីពីន ក៏បានប្រគល់ខ្លួនឲ្យប៉ូលិសផងដែរ ដើម្បីសម្អាតឈ្មោះរបស់ពួកគេ ដោយសន្យាសហការជាមួយអាជ្ញាធរអនុវត្តច្បាប់។

កាលពីថ្ងៃសុក្រកន្លងមក លោក Duterte បានក្រើនរំលឹកឡើងវិញពីបទបញ្ជារបស់លោក«បាញ់សម្លាប់»ពួកឈ្មួញគ្រឿងញៀន ដែលប្រឆាំងនឹងការចាប់ខ្លួន។ លោកថ្លែងថា លោកនឹងទទួលខុសត្រូវចំពោះការបង្ក្រាបគ្រឿងញៀនដ៏បង្ហូរឈាមនេះ។

មនុស្សរហូតដល់ ៧៧០ ទៅ ៨០០នាក់ហើយ ត្រូវបានគេសម្លាប់ នៅក្នុងប្រតិបត្តិប៉ូលិសប្រឆាំងនឹងគ្រឿងញៀនខុសច្បាប់ ចាប់តាំងពីលោក Duterte បានស្បថចូលកាន់តំណែងជាប្រធានាធិបតី កាលពីថ្ងៃទី៣០ ខែមិថុនាកន្លងមក ក្នុងនោះមានទាំងក្រុមជនអន្ធពាលជាង ២០០នាក់ផងដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ