ក្រសួងការបរទេសអាមេរិកកាលពីថ្ងៃចន្ទម្សិលមិញ បានជំរុញឲ្យប្រទេសថៃអនុញ្ញាតឲ្យចាប់ផ្ដើមឡើងវិញនូវសេរីភាពស៊ីវិល បន្ទាប់ពីប្រទេសនេះបានគាំទ្រសេចក្ដីព្រាងរដ្ឋធម្មនុញ្ញដែលសរសេរដោយពួកយោធា សម្រាប់បើកផ្លូវឆ្ពោះទៅការបោះឆ្នោតជាតិនាពេលខាងមុខ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីអ្នកនាំពាក្យក្រសួងការបរទេសអាមេរិកអ្នកស្រី Elizabeth Trudeau។
បើយោងតាម Reuters អ្នកស្រី Trudeau បានថ្លែងនៅក្នុងសន្និសីទកាសែតមួយថា សហរដ្ឋអាមេរិកបានលើកឡើងពីក្ដីបារម្ភអំពីសេចក្ដីព្រាងរដ្ឋធម្មនុញ្ញនោះជាមួយរដ្ឋាភិបាលថៃ។
ការជំរុញរបស់ក្រសួងការបរទេសអាមេរិកត្រូវបានធ្វើឡើងមួយថ្ងៃ ក្រោយពីប្រជាជនជាង៦០ភាគរយបានបោះឆ្នោតគាំទ្រសេចក្ដីព្រាងរដ្ឋធម្មនុញ្ញកាលពីថ្ងៃអាទិត្យកន្លងមក៕
