មន្ត្រីនគរបាលអន្តោប្រវេសន៍កម្ពុជា បានឲ្យដឹងថា អាជ្ញាធរកម្ពុជាបានឃាត់ខ្លួនជនអន្តប្រវេសន៍ខុសច្បាប់ជាង ៤០០នាក់ នៅក្នុងរយៈពេលជិត ២ខែដើមឆ្នាំ២០១៧នេះ ដែលភាគច្រើននៃជនអន្តោប្រវេសន៍ទាំងនោះ គឺជាជនជាតិវៀតណាម។
របាយការណ៍របស់អគ្គនាយកដ្ឋានអន្តោប្រវេសន៍កម្ពុជា ដែលវីអូឌីទទួលបាននៅថ្ងៃនេះ បានបង្ហាញថា គិតចាប់ពីថ្ងៃទី០១ ខែមករា រហូតដល់ថ្ងៃនេះ អាជ្ញាធរអន្តោប្រវេសន៍កម្ពុជា បានឃាត់ខ្លួន និងបញ្ជូនត្រឡប់ទៅប្រទេសកំណើតវិញ នូវជនបរទេសស្នាក់នៅខុសច្បាប់នៅកម្ពុជាចំនួន ៤២៧នាក់ ក្នុងនោះមានស្ត្រីចំនួន ៩៥នាក់ នៅក្នុងចំណោមជនបរទេស ២៤សញ្ញាតិផ្សេងគ្នា។
របាយការណ៍ដដែលនេះ បានឲ្យដឹងបន្ថែមថា ក្នុងចំណោមជនបរទេសដែលអាជ្ញាធរកម្ពុជាឃាត់ខ្លួន និងបញ្ជូនត្រឡប់ទៅប្រទេសកំណើតវិញនោះ ជនអន្តោប្រវេសន៍វៀតណាម មានចំនួនដល់ទៅ ៣៦២នាក់ ឬស្មើនឹងជាង ៨៤ភាគរយ ក្នុងនោះមានស្ត្រីចំនួន ៨៩នាក់។
គិតត្រឹមឆ្នាំ២០១៤ រហូតដើមឆ្នាំ២០១៧នេះ កម្ពុជាបានចាប់បញ្ជូន និងបណ្តេញចេញជនបរទេសសរុបចំនួន ១២០៨៨នាក់ ស្រី ២០២៨នាក់ ក្នុងនោះមានជនជាតិវៀតណាមសរុបចំនួន ១០១៣៩នាក់៕