ប្រធានស្តីទីគណបក្សសង្គ្រោះជាតិថ្លែងថា ប្រសិនបើថ្នាក់ដឹកនាំគណបក្សប្រជាជនកម្ពុជាមិនចង់ជជែកជាមួយដើម្បីដោះស្រាយបញ្ហាប្រឈមនោះទេ លោកនឹងនាំមន្ត្រីផ្សេងៗទៀតទៅនិយាយជាមួយប្រជាពលរដ្ឋនៅតាមមូលដ្ឋាន។ នេះបើតាមហ្វេសប៊ុករបស់លោក អេង ឆៃអ៊ាង។
តាមហ្វេសប៊ុកលោក អេង ឆៃអ៊ាង គឺ នៅក្នុងកិច្ចប្រជុំជាមួយថ្នាក់ដឹកនាំគណបក្សតាមរាជធានីខេត្តទូទាំងប្រទេសនៅស្នាក់កណ្តាលគណបក្សកាលពីថ្ងៃសុក្រម្សិលមិញលោកកឹម សុខា ថ្លែងថា បើបក្សប្រជាជនមិនចង់ចរចាជាមួយបក្សប្រឆាំង លោកនឹងចុះតាមមូលដ្ឋាននិយាយជាមួយពលរដ្ឋ។៖«បើគណបក្សកាន់អំណាច គេមិនត្រូវការជួបចរចា ជាមួយយើង យើងត្រូវនាំគ្នាទៅនិយាយជាមួយប្រជាពលរដ្ឋនៅតាមមូលដ្ឋាន។»
បញ្ជាក់ថាជំនួបរវាងគណបក្សប្រជាជននិងបក្សប្រឆាំងដែលគ្រោងនឹងត្រូវជួបគ្នានៅថ្ងៃទី២៥ មករា ខាងមុខត្រូវបានលើកពេលវិញដោយមិនបញ្ជាក់ពីមូលហេតុ។
តែការលើកពេលនេះធ្វើឡើងបន្ទាប់ពីមានសារគំរាមរបស់លោក ហ៊ុន សែន ពីក្រៅប្រទេសកាលពីថ្ងៃទី១៦ថាលោកលែងចង់ជួបចរចារជាមួយបក្សប្រឆាំងទៀតហើយ ដោយថា មកពីបក្សប្រឆាំងតែងតែប៉ុនប៉ងប្រើប្រាស់ការចរចានេះ ឲ្យដោះលែងមនុស្សមួយចំនួន ដែលលោក ហ៊ុន សែន ថាជាការបំពានដល់អំណាចតុលាការ៕
