យ៉ាងហោចណាស់ផ្ទះ ៤គ្រួសារនៅក្នុងសង្កាត់ព្រែកប្រា ខណ្ឌច្បារអំពៅ បានខូចខាតទាំងស្រុងបន្ទាប់ពីត្រូវភ្លើងឆេះនៅព្រឹកថ្ងៃនេះ។ នេះបើតាមសេចក្ដីរាយការណ៍របស់នគរបាលជាតិ។
សេចក្ដីរាយការណ៍ដែលចុះផ្សាយលើវេបសាយនគរបាលជាតិ បានឲ្យដឹងថា អគ្គីភ័យមួយបានកើតឡើងនៅម៉ោង ៣ និង ១០នាទី ទាបភ្លឺថ្ងៃទី២១ ខែមករានេះ ដោយបានបំផ្លាញផ្ទះសម្បែងពលរដ្ឋ ៤គ្រួសារទាំងស្រុង នៅភូមិព្រះពន្លា។
នគរបាលជាតិ បានរាយការណ៍បន្ថែមថា ប៉ុន្តែ គ្មានសេចក្ដីរាយការណ៍អំពីគ្រោះថ្នាក់ដល់អាយុជីវិតមនុស្សនោះឡើយ។
តាមរបាយការណ៍របស់ក្រសួងមហាផ្ទៃកាលពីឆ្នាំ២០១៧ អគ្គិភ័យបានកើតឡើងចំនួន ៥១៤លើកនៅទូទាំងប្រទេស ដោយបានសម្លាប់មនុស្ស ២២នាក់ (ស្រី១៣នាក់) និងបណ្ដាលឲ្យមនុស្ស ១២៨នាក់រងរបួស ប៉ុន្តែចំនួននេះបានថយចុះរហូតដល់ ១៩ភាគរយ បើប្រៀបធៀបតួលេខអគ្គីភ័យកាលពីឆ្នាំ ២០១៦៕
សរសេរមកកាន់ លោក លី វេហា តាមរយៈ [email protected]