សមត្ថកិច្ចឥណ្ឌូនេស៊ី បានឃាត់ខ្លួនមនុស្សប្រមាណ៣០នាក់ ដែលសង្ស័យថា កំពុងរៀបចំបណ្តុះបណ្តាល បង្កើតជាកម្លាំងទ័ពពាក់ព័ន្ធនិងសកម្មភាពរបស់រដ្ឋឥស្លាមក្នុងការធ្វើសកម្មភាពបះបោរប្រឆាំងរដ្ឋាភិបាល។
សមត្ថកិច្ចឥណ្ឌូនេស៊ីថ្លែងថា ដំបូងឡើយពួកគេបានឃាត់ខ្លួនមនុស្ស៥នាក់ កាលពីថ្ងៃសុក្រ នៅពេលគេវាយឆ្មក់ចូលតំបន់មួយនៅក្នុងទីក្រុងម៉ាឡាង ហើយនៅថ្ងៃដដែលនោះ ពួកគេក៏បានឃាត់ខ្លួនមនុស្សប្រមាណ៣០នាក់ទៀតនៅតំបន់ភ្នំសាំប៊ីង ខណៈក្រុមទាំងនេះកំពុងស្ថិតក្នុង វគ្គបណ្តុះបណ្តាល។ នេះបើតាមសារព័ត៌មានChannel News Asia។
ទោះយ៉ាងណាសមត្ថកិច្ចនៅមិនទាន់ច្បាស់ថា អ្នកទាំងប៉ុន្មាននាក់នោះ ជាប់ពាក់ព័ន្ធករណីក្រុមប្រដាប់អាវុធ និង អ្នកធ្វើអត្តឃាតវាយប្រហារនៅទីក្រុងចាការតា កាលពីខែមុនដែលសម្លាប់ប្រជាពលរដ្ឋអស់៤នាក់នោះឬអត់ទេ។ ការវាយប្រហារនៅពេលនោះ ក្រុមរដ្ឋឥស្លាមអះអាងថា ពួកគេជាអ្នកធ្វើ។
មន្ត្រីជាន់ខ្ពស់នគរបាលឥណ្ឌូនេស៊ី ផ្នែកប្រឆាំងភេរវកម្មថ្លែងថា ពិតជាមានការវាយឆ្មក់ចូលទៅតំបន់ដែលក្រុមប្រមាណ៣០នាក់នេះ កំពុងទទួលការបណ្តុះបណ្តាល នៅលើភ្នំប្រាកដមែន។
