និស្សិតមហាវិទ្យាល័យ ១៣នាក់ ដែលស្ថិតក្នុងដំណើរទៅបោះជំរុំថ្ងៃឈប់សម្រាកនោះ និងអ្នកបើកបររថយន្តក្រុងម្នាក់ បានស្លាប់ ហើយរាប់សិបនាក់ទៀត បានរងរបួសកាលពីថ្ងៃម្សិលមិញនេះ នៅពេលរថយន្តក្រុងនោះ បុកទៅនឹងបង្គោលភ្លើង នៅតំបន់ភ្នំមួយ ក្នុងប្រទេសហ្វីលីពីន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីប៉ូលិសហ្វីលីពីន។
AFP បានផ្សាយបន្តថា រថយន្តក្រុងនោះ បានដឹកនិស្សិតជំទង់ៗជាង ៥០នាក់ និងគ្រូបង្រៀនម្នាក់ ធ្វើដំណើរកម្សាន្ត នៅពេលអ្នកបើកបរបានបាត់បង់ម្ចាស់ការ អំឡុងពេលបើកបរលើផ្លូវតាមចង្កេះភ្នំ នៅតំបន់តាណាយ។
ប៉ូលិសហ្វីលីពីនបានប្រាប់ AFP ថា និស្សិត ១០នាក់ បានស្លាប់នៅនឹងកន្លែង ខណៈនិស្សិត ៤នាក់ទៀត ក្នុងនោះមានទាំងអ្នកបើកបរផងដែរ បានស្លាប់នៅឯមន្ទីរពេទ្យ។
ចំណែកនិស្សិតជិត ៤០នាក់ទៀត បានរងរបួសធ្ងន់ធ្ងរ ដែលត្រូវការបញ្ជូនទៅសង្គ្រោះនៅមន្ទីរពេទ្យធំ៕