ក្រសួងការបរទេសរុស្ស៊ីបានប្រកាសថា ប្រេសិតរុស្ស៊ីប្រចាំអង្គការសហប្រជាជាតិ លោក Vitaly Churkin បានស្លាប់ភ្លាមៗនៅថ្ងៃនេះ ប៉ុន្តែ ពុំបានផ្ដល់ព័ត៌មានលម្អិតនោះឡើងអំពីមូលហេតុនៃការស្លាប់របស់អ្នកកាទូតរូបនេះនោះទេ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រសួងការបរទេសរុស្ស៊ីបាននិយាយក្នុងសេចក្ដីប្រកាសព័ត៌មានមួយថា តំណាងអចិន្ត្រៃយ៍រុស្ស៊ីប្រចាំនៅអង្គការសហប្រជាជាតិ លោក Vitaly Churkin បានស្លាប់ភ្លាមៗនៅទីក្រុងញូវយ៉ក នៅថ្ងៃទី២១ ខែកុម្ភៈនេះ។
ក្រសួងការបរទេសរុស្ស៊ីបាននិយាយថា លោក Churkin បានស្លាប់នៅមួយថ្ងៃមុនខួបកំណើត ៦៥ឆ្នាំរបស់លោក ហើយក្រសួងកាបរទេសរុស្ស៊ីបានចូលរួមរំលែកទុក្ខជាមួយក្រុមគ្រួសាររបស់លោក។
លោក Churkin បានកាន់តួនាទីនេះចាប់តាំងពីឆ្នាំ២០០៦មក។ ប៉ុន្តែ មុននឹងកាន់តួនាទីនេះ លោកធ្លាប់បម្រើការជាប្រេសិតប្រចាំប្រទេសកាណាដា ប៊ែលហ្ស៊ិក និងតំណាងពិសេសសម្រាប់ជជែកពីបញ្ហាប្រទេសយូហ្កូស្លាវី៕