នាយករដ្ឋមន្ត្រីកម្ពុជា ព្រមានទុកមុនថា នឹងធ្វើឲ្យកិច្ចប្រជុំ អាស៊ាន អូស្ត្រាលី ជាប់គាំង ក្នុងការចេញសេចក្តីថ្លែងការណ៍រួមមិនរួចបើប្រទេសនោះឆ្លៀតយកជំនួបនេះ ដាក់សម្ពាធការដឹកនាំរបស់លោកដូចការលើកឡើងមែននោះ។
នៅដើមសប្តាហ៍នេះ អតីតមេដឹកនាំបក្សប្រឆាំង លោក សម រង្ស៊ី ពេលចុះជួបអ្នកគាំទ្រនៅប្រទេសអូស្ត្រាលី ហើយអំពាវនាវឲ្យប្រទេសអូស្ត្រាលី និងបណ្តាប្រទេសលោកខាងលិច ជួយដាក់សម្ពាធ រដ្ឋាភិបាល កម្ពុជា ដែលដឹកនាំដោយលោក ហ៊ុន សែន ឲ្យវិលមកគោរពសិទ្ធិមនុស្ស និងលទ្ធិប្រជាធិបតេយ្យឡើងវិញ ។
ក្នុងជំនួបនោះដែរ ខ្មែរនៅអូស្ត្រាលី បានលើកឡើងថា មន្ត្រីជាន់ខ្ពស់ របស់បក្សប្រឆាំងអូស្ត្រាលី បានជំរុញរដ្ឋាភិបាលខ្លួន ឲ្យលើកបញ្ហានេះ ចំពោះមុខមេដឹកនាំកម្ពុជាលោក ហ៊ុន សែន ដែលទៅទស្សនកិច្ច ចំពោះមុខសមាជិកអាស៊ាន ១០ប្រទេសផ្សេងទៀត ដោយថាការជំរុញនោះ ដើម្បីបើកផ្លូវឲ្យគណបក្សប្រឆាំងនៅកម្ពុជាដែលបានរំលាយទៅហើយនោះបានចូលរួមបោះឆ្នោត តាមយន្តការប្រជាធិបតេយ្យឡើងវិញ។ កិច្ចប្រជុំអាស៊ាន-អូស្ត្រាលី ប្រព្រឹត្តទៅនៅពាក់កណ្តាលខែក្រោយ។
លោកថា៖ «អ្នកនាំពាក្យក្រសួងការបរទេសផ្នែកបក្សប្រឆាំង[អូស្ត្រាលី]នេះបានលើកឡើងថា នឹងអំពាវនាវនៅពេលដែលលោក ហ៊ុន សែន មកទស្សនកិច្ចអាស៊ាន អូស្ត្រាលី នៅថ្ងៃទី១៥ដល់ថ្ងៃទី១៨ខែមិនាខាងមុខនេះ គឺរដ្ឋាភិបាលអូស្ត្រាលីត្រូវតែយកឱកាសនេះហ្នឹងទាមទារឲ្យមានគណបក្សសង្គ្រោះជាតិធ្វើកិច្ចការពេញលេញ របស់ខ្លួន»។
ប៉ុន្តែនាយករដ្ឋមន្ត្រីកម្ពុជា លោក ហ៊ុន សែន ក្នុងពិធីជួបកម្មករ នៅរាជធានីភ្នំពេញ នាថ្ងៃនេះ បានប្រតិកម្មថា បើរដ្ឋាភិបាលអូស្ត្រាលី ហ៊ានធ្វើដូចនេះមែន កម្ពុជានឹងធ្វើឲ្យកិច្ចប្រជុំអាស៊ាន អូស្ត្រាលី ជាប់គាំង ចេញសេចក្តីថ្លែងការណ៍រួមមិនរួច។
លោកថា៖ «សុំផ្តាំទៅ ស្គាល់អាស៊ានឲ្យច្បាស់បន្តិច។ អាស៊ានបើអត់ ហ៊ុន សែន អត់ហៅថាអាស៊ានទេ។ហ៊ុន សែនអាចជំទាស់កុំឲ្យចេញសេចក្តីថ្លែងការណ៍ណាមួយរួច រវាងអាស៊ាន និងអូស្ត្រាលី សាកល្បងលមើលទៅ។មិនត្រឹមតែអូស្ត្រាលី មិនអាចគៀបសង្កាត់កម្ពុជាទេ ហ៊ានមើល កម្ពុជាសុំដាក់បញ្ហាទុកជាមុន បើសិនអ្នកឯងហ៊ានផ្តេសផ្តាស កម្ពុជាតែម្នាក់អាចនឹងធ្វើឲ្យគាំងទាំងអស់នៃការចេញសេចក្តីថ្លែងការណ៍ ព្រោះរបៀបរបបនៃការងារអាស៊ាន វាត្រូវតែមានកុងសង់ស៊ី [ការឯកភាពរួម]»។
បើតាមការអះអាងរបស់សមាគមខ្មែរនៅក្រៅប្រទេស ខ្មែរនៅអូស្ត្រាលី មួយចំនួនដែលមិនគាំទ្រការដឹកនាំ របស់រដ្ឋាភិបាលកម្ពុជា នឹងប្រមូលផ្តុំគ្នាធ្វើបាតុកម្ម ប្រឆាំងនិងវត្តមានលោក ហ៊ុន សែន នៅពេលនោះដែរ។
ទោះជាយ៉ាងណា លោក ហ៊ុន សែន អះអាងថា លោកមានអ្នកគាំទ្រ ច្រើនជាងអ្នកប្រឆាំង ហើយចាត់ទុកថា ការធ្វើបាតុកម្ម ជាសេរីភាពបញ្ចេញមតិ ប៉ុន្តែលោកព្រមានថា នឹងមិនលើកលែងដល់បាតុករណាដែល ធ្វើរូបទីងមោងប្រដូចរូបលោក ហើយយកដុតនោះទេ។
លោកថា៖ «ជានិច្ចកាលខ្ញុំទៅទីណាក៏ដោយអ្នកធ្វើបាតុកម្មមានប្រមាណជា១០ភាគរយនៃអ្នកដែលមកជួបខ្ញុំ តែប៉ុណ្ណោះ។ អាអ្នកធ្វើបាតុកម្មស្រែកឡូឡានៅខាងក្រៅវាតិច តែអ្នកមកជួបសុំស្វាគមន៍វាច្រើនជាង។ ទៅធ្វើទៅ ស្រែកទៅ តែសុំផ្តាំ កុំដុតរូបឲ្យសោះណាស់ តែដុតរូបអាញ់តាមដល់ផ្ទះ អាញ់ប្រាប់ឲ្យហើយ»។
អ្នកវិភាគធ្លាប់ព្រមានថា របត់នយោបាយនៅកម្ពុជា ដែលឈានទៅការរំលាយគណបក្សសង្គ្រោះជាតិ ចាប់ឃុំខ្លួនលោក កឹម សុខា បិទប្រព័ន្ធផ្សព្វផ្សាយឯករាជ្យ និងគំរាមក្រុមអង្គការសង្គមស៊ីវិល នោះថា កំពុងជំរុញឲ្យមានភាពផុយស្រួយនៃការបែកបាក់ជាតិ និងបានរំឭកថា ការដែលមេដឹកនាំបង្កើតកម្តៅការទូតជាមួយប្រទេសលោកសេរី ថាកម្ពុជាអ្នកខាតបង់៕