អនុប្រធានាធិបតីរបស់សហរដ្ឋអាមេរិក មានគម្រោងជួបជាមួយមន្ត្រីជាន់ខ្ពស់របស់កូរ៉េខាងជើងច្រើនរូបក្នុងដំណើរទស្សនកិច្ចនៅក្នុងប្រទេសកូរ៉េខាងត្បូង ដែលក្នុងនោះរួមទាំងប្អូនស្រីរបស់លោក គីម ជុងអ៊ុន ផងដែរ។
ប៉ុន្តែនៅព្រឹកនេះ មន្ត្រីរបស់សហរដ្ឋអាមេរិកបានប្រកាសថា ភាគីខាងកូរ៉េខាងជើងបានប្រកាសលុបចោលគម្រោងជួបនោះវិញហើយ។ នេះបើតាមទីភ្នាក់ងារព័ត៌មានរ៉យទ័រ។
ប្រធានផ្នែកបុគ្គលិករបស់លោក Mike Pence គឺលោក Nick Ayers ថ្លែងថា ដំបូងឡើយភាគីទាំងពីរបានផ្ញើសារទៅវិញទៅមកបញ្ជាក់ពីការណាត់ជួបក្នុងឱកាសព្យុហយាត្រា ក្នុងការប្រកួតកីឡាអូឡាំពិករដូវត្រជាក់។ ប៉ុន្តែ ក្រោយពេលដែលអនុប្រធានាធិបតីអាមេរិក ថ្កោលទោសកូរ៉េខាងជើងពីការរំលោភសិទ្ធិមនុស្ស និង គម្រោងនៃការដាក់ទណ្ឌកម្មបន្ថែមលើកូរ៉េខាងជើង ទើបគណៈប្រតិភូកូរ៉េខាងជើងសម្រេចលុបចោលគម្រោងនៃការជួបប្រជុំនេះ។
តាមគម្រោងលោក Pence នឹងជួបជាមួយប្អូនស្រីមេដឹកនាំកូរ៉េខាងជើងលោកស្រី Kim Yo Jong និងអ្នកដឹកនាំគណៈប្រតិភូរបស់រដ្ឋលោក Kim Yong Nam ប៉ុន្តែកូរ៉េខាងជើងបានប្រកាសលុបចោលវិញមុនការជូប២ម៉ោង៕
