មន្ត្រីអង្គការសហប្រជាជាតិទទួលកិច្ចការជនភៀសខ្លួនបានថ្លែងកាលពីថ្ងៃពុធម្សិលមិញថា ជនភៀសខ្លួនប្រមាណ៥០០នាក់ធ្វើដំណើរចេញពីអាហ្រ្វិកអាចនឹងស្លាប់ក្នុងសមុទ្រមេឌីទែរ៉ាណេ។
អ្នករស់រានមានជីវិតម្នាក់ដែលគេប្រទះឃើញនៅអណ្តែតក្នុងសមុទ្រ ហើយត្រូវបានជួយសង្គ្រោះដោយនាវាអ្នកជំនួញម្នាក់បានប្រាប់មន្ត្រីអង្គការសហប្រជាជាតិទទួលកិច្ចការជនភៀសខ្លួនថា ជនភៀសខ្លួនជាច្រើនធ្លាក់ខ្លួនជាជនត្រូវគេជួញដូរ ហើយត្រូវបានគេព្យាយាមដឹកជញ្ជូនតាមនាវាទៅតំបន់ខ្លះនៅចន្លោះប្រទេសលីប៊ីនិងអ៊ីតាលី។ នេះបើតាមសារព័ត៌មាន Channel News Asia។
សហភាពអឺរ៉ុបកំពុងតែស្វះស្វែងរកមធ្យោបាយក្នុងការដោះស្រាយវិបត្តិជនភៀសខ្លួន ដោយសារបញ្ហាសង្គ្រាម ភាពក្រីក្រ និងការធ្វើទុក្ខបុកម្នេញ ដែលក្លាយជាវិបត្តិជនភៀសខ្លួនយ៉ាងក្រក់បំផុតនៅអឺរ៉ុបតាំងពីសង្គ្រាមលោកលើកទី២មក។
របាយការណ៍ឧត្តមស្នងការអង្គការសហប្រជាជាតិទទួលបន្ទុកសិទ្ធិជនភៀសខ្លួនបានបង្ហាញថា នៅឆ្នាំ២០១៥ មានអ្នកធ្វើដំណើរឆ្លងដែនទៅអឺរ៉ុបមានចំនួន១៧៩ ០០០នាក់។ ជនភៀសខ្លួនដែលធ្វើដំណើរតាមសមុទ្រមេឌីទែរ៉ាណេចំនួណ៣ ៧០០នាក់បានស្លាប់នៅក្នុងឆ្នាំ២០១៥ ហើយនៅប៉ុន្មានខែនៃឆ្នាំ២០១៦នេះ ៧៦១នាក់បានស្លាប់និងបាត់ខ្លួន៕