លោក ដូណល ត្រាំ និងលោក គីម ជុងអ៊ុន គ្រោងជួបគ្នានៅចុងខែឧសភា ឬ នៅដើមខែមិថុនានោះ បានក្លាយទៅជាព័ត៌មានដែលមានការចាប់អារម្មណ៍ខ្លាំងពីសារព័ត៌មានធំៗនៅលើពិភពលោក។
ទន្ទឹមនឹងនេះ អ្នកវិភាគខ្លះលើកឡើងថា វាជាសញ្ញាល្អនៃសន្តិភាព អ្នកខ្លះចង់ដឹងថា លទ្ធផលទៅជាយ៉ាងណា? អ្នកខ្លះថា អាចជាល្បិចរបស់អាមេរិក ឬ ល្បិចរបស់កូរ៉េខាងជើង ហើយអ្នកខ្លះទៀតសង្ស័យថា ជាល្បិចនយោបាយរបស់ប្រទេសទាំងពីរ ដើម្បីផលប្រយោជន៍ប្រទេសគេតែប៉ុណ្ណោះ។
ទោះយ៉ាងណានៅក្នុងសប្តាហ៍នេះ មានសញ្ញាមួយចំនួនហាក់បង្ហាញថា អាមេរិកដែលទាមទារឲ្យមានការចរចាកន្លងមកនេះចង់គេចវេះទៅវិញ គឺខណៈកូរ៉េខាងជើងបន្ទន់ខ្លួនចង់ចរចា មេដឹកនាំអាមេរិកនៅតែបន្តវាយប្រហារនិងព្រមានដកខ្លួនចេញជាបន្តបន្ទាប់។
ក្នុងសន្និសីទសារព័ត៌មានជាមួយមេដឹកនាំជប៉ុនកាលពីថ្ងៃពុធលោក ត្រាំ បែរជា បើកកកាយដំណើរទស្សនកិច្ចសម្ងាត់របស់នាយកCIA ជួបជាលោក គីម ជុងអ៊ុន។ ពេលនោះ លោក ត្រាំ ក៏បានព្រមានថា លោកនឹងដើរចេញពីការចរចា បើសិនជាមិនបានផលហើយងាកទៅរកការធ្វើសង្គ្រាមវិញ។ នៅថ្ងៃព្រហស្បតិ៍ មួយថ្ងៃបន្ទាប់មកទៀត លោក ត្រាំថ្លែងថា បើលោកគិតថា ការជួបជាមួយលោក គីមមិនបានផលទេនោះ លោកនឹងមិនជួបតាមការគ្រោងទុកនោះឡើយ។
ដោយឡែកមេដឹកនាំវ័យក្មេង ដែលធ្លាប់តែបង្ហាញចរិត ឆេវឆាវនោះ នៅតែរក្សាភាពស្ងប់ស្ងាត់ដដែលមិនមានប្រតិកម្មអ្វីទៅនឹងមេដឹកនាំអាមេរិកទេ។ ផ្ទុយទៅវិញនៅថ្ងៃសុក្រម្សិលមិញ លោក គីម ជុងអ៊ុន បានបញ្ចាក់ថា នឹងផ្អាករាល់ការសាកល្បងអាវុធនុយក្លេអ៊ែ និងមីស៊ីលគ្រប់ប្រភេទ។
លោក គីម ជុងអ៊ុន នៅតែរៀបចំខ្លួនដើម្បីជួបមេដឹកនាំកូរ៉េខាងត្បូង និង អាមេរិក បើទោះបីជាដឹងថា បំណងរបស់អាមេរិកនិងកូរ៉េខាងត្បូងចង់រំលាយកម្មវិធីអាវុធនុយក្លេអ៊ែរបស់ខ្លួនក៏ដោយ។ លោក គីម ជុងអ៊ុន កន្លងមកធ្លាប់ថ្លែងថា នឹងមិនបោះបង់ទេ ព្រោះអាវុធនុយក្លេអ៊ែគឺកើតចេញពីឈាមពលរដ្ឋកូរ៉េខាងជើង ដើម្បីការពារប្រទេស។