ក្រសួងយុត្តិធម៌អះអាងថា ហ្វេសប៊ុកផ្លូវការរបស់ខ្លួនត្រូវបានជនអនាមិកលួចចូលគ្រប់គ្រង និងបានស្នើរឱ្យក្រសួងមហាផ្ទៃចាត់វិធានការណ៍ជននោះ និងបក្ខពួកតាមផ្លូវច្បាប់។
កាលពីថ្ងៃម្សិលមិញនេះ ទំព័រហ្វេសប៊ុករបស់ក្រសួងយុត្តិធម៌ បានចែករំលែកវីដេអូចំនួន ២ នៅលើទំព័រហ្វេសប៊ុកផ្លូវការរបស់អតីតមេបក្សប្រឆាំង លោក សម រង្ស៊ី ដែលបានផ្សព្វផ្សាយអំពីក្បួនឃោសនាបោះឆ្នោតរបស់គណបក្សសង្គ្រោះជាតិ។
ក្នុងបណ្ដឹងដាក់ទៅអគ្គស្នងការនគរបាលជាតិកម្ពុជា អ្នកនាំពាក្យក្រសួងយុត្តិធម៌ លោក គឹម សន្តិភាព បានអះអាងថា មិនត្រឹមតែទំព័រហ្វេសប៊ុករបស់ក្រសួងយុត្តិធម៌ទេ សូម្បីតែគណនីអ៊ីម៉ែលផ្ទាល់ខ្លួនរបស់លោក ក៏ត្រូវបានជនអនាមិកចូលគ្រប់គ្រងផងដែរ។
លោក គឹម សន្តិភាព បានស្នើទៅនគរបាលជាតិ ឲ្យស្វែងរកចាប់ខ្លួនជនដៃដល់ និងអ្នកពាក់ព័ន្ធ ដែលលោកថា បានលួចចូលគ្រប់គ្រងលើបណ្ដាញសង្គម និងអ៊ីម៉ែលផ្ទាល់របស់លោក៕
