អ្នកឃ្លាំមើលបញ្ហានយោបាយនិងសង្គមល្បីឈ្មោះមួយរូប ស្នើទៅតុលាការជាន់ខ្ពស់ដោះលែងឲ្យនៅក្រៅឃុំបណ្តោះអាសន្ន ដោយថាការសម្រេចរបស់សាលាដំបូងរាជធានីភ្នំពេញធ្វើឡើងក្រោមសម្ពាធនយោបាយ និងខុសនីតិវិធីច្បាប់។
ក្នុងបន្ទប់សវនាការ នៅថ្ងៃនេះ លើបណ្តឹងប្រឆាំងការនឹងការជុំខ្លួន ចៅក្រមតុលាការកំពូលបានសួរដេញដោលជាង១ម៉ោង ជុំវិញការប្តឹងរបស់មេធាវីរដ្ឋាភិបាល ដោយចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋអាទិ៍ និងបរិហាកេរ្តិ៍ជាសាធារណៈ ពាក់ព័ន្ធនឹងការវិភាគទាក់ទងករណីការបាញ់សម្លាប់លោក កែម ឡី។
ឈរនៅក្នុងរង្វង់ក្រចកសេះ នៅក្នុងបន្ទប់សវនាការតុលាការកំពូលនាព្រឹកថ្ងៃទី២១ ខែមិថុនានេះ លោក គឹម សុខ បានច្រានចោលការលើកឡើងរបស់លោក គី តិច ដែលការពារក្តីឲ្យលោក ហ៊ុន សែន។ លោក គឹម សុខ អះអាងថា ការវិភាគ រួមទាំងបទសម្ភាស៍ នៅវិទ្យុអាស៊ីសេរី លោកមិនបានចោទប្រកាន់លោកនាយករដ្ឋមន្ត្រីឡើយ។ លោក គឹម សុខ ក៏បានស្នើឲ្យចៅក្រមតុលាការកំពូលដោះលែងរូបលោក ឲ្យបាននៅក្រៅឃុំបណ្តោះអាសន្នផងដែរ។
លោក គឹម សុខ បានលើកឡើងទៀតថា បើតុលាការធ្វើតាមផ្លូវច្បាប់និងឈលើគោលការណ៍ឯករាជ្យ គួរដាក់កំហិតឲ្យលោកឈប់និយាយជាមួយប្រព័ន្ធផ្សព្វផ្សាយ ជាជាងចាប់ដាក់ពន្ធនាគារ។
ក្នុងបន្ទប់សវនាការនោះ លោក គី តិច មេធាវីការពារក្ដីឲ្យលោកនាយករដ្ឋមន្ត្រី ហ៊ុន សែន បានលើកឡើងថា ការសម្រេចរបស់ចៅក្រមសាលាដំបូងរាជធានីភ្នំពេញ ដែលបញ្ជាឲ្យឃុំខ្លួនលោក គឹម សុខ មិនខុសច្បាប់ឡើយ ដោយថាបើទុកឲ្យបុគ្គលរូបនោះបន្តវិភាគទៀត អាចធ្វើឲ្យមានចលាចលក្នុងសង្គម។ លោកស្នើទៅតុលាការកំពូលសម្រេចបន្តឃុំខ្លួនលោកគឹម សុខ ដូចអំណាចសាលក្រមសាលាដំបូង។
ចំណែកឯ មេធាវីការពារក្ដីឲ្យលោក គឹម សុខ គឺលោក ជូង ជូងី បានពន្យល់ពីចំណាត់ការរបស់សាលាដំបូងរាជធានីភ្នំពេញថា ធ្វើឡើងលឿនខុសពីសំណុំរឿងផ្សេងៗ ដោយតុលាការមិនបានទុកពេលឲ្យកូនក្ដីរបស់លោករកមេធាវីដើម្បីការពារក្ដី ពោលក្រោយពីលោក ហ៊ុន សែន ដាក់ពាក្យបណ្ដឹងនៅថ្ងៃទី១៣ខែកុម្ភៈ ហើយនៅថ្ងៃដដែល តុលាការក៏បានចេញដីកាកោះឲ្យចូលបំភ្លឺ ដោយ៤ថ្ងៃបន្ទាប់។ នៅពេលនោះតុលាការបញ្ជាឲ្យឃុំខ្លួនតែម្ដង ដោយលោកចាត់ទុកចំណាត់ការរបស់តុលាការធ្វើឡើងផ្ទុយទៅនឹងច្បាប់។
ករណីទំាងនេះ ត្រូវបានលោក ជូង ជូងី ស្នើទៅតុលាការកំពូលឲ្យពិចារណា និងដោះលែងកូនក្តីរបស់ខ្លួន ឲ្យមានសេរីភាពវិញ។
បើតាមប្រធានក្រុមប្រឹក្សាជំនុំជម្រះនៃតុលាការកំពូលលោកស្រី គឹម សុត្ថាវី បានឲ្យដឹងថាសំណុំរឿងលោក គឹម សុខ ដែលប្តឹងសុំនៅក្រៅឃុំ នឹងប្រកាសនៅថ្ងៃទី២៨ ខែមិថុនា វេលាម៉ោង៨ព្រឹក។
មន្ត្រីឃ្លាំមើលសិទ្ធិមនុស្សសមាគមអាដហុក លោក សំ ចាន់គា យល់ថា បើតុលាការកំពូលសម្រេចបន្តឃុំខ្លួនលោក គឹម សុខ និងធ្វើឲ្យអង្គការជាតិ អន្តរជាតិ មើលឃើញថាប៉ះពាល់ដល់ប្រព័ន្ធយុត្តិធម៌នៅកម្ពុជា។
លោកនិយាយថា «ប៉ះពាល់ដល់ប្រជាប្រិយភាពនៃប្រព័ន្ធយុត្តិធម៌នេះ មតិជាតិនិងមតិអន្តរជាតិគេបានវាយម្លៃថា វាប៉ះពាល់រួចទៅហើយ មិនបាច់ថាយកករណីនេះទេ[គឹម សុខ] ករណីជាច្រើនដែលធ្វើឲ្យទំាងរដ្ឋាភិបាលនិងទំាង តុលាការធ្វើឲ្យប៉ះពាល់ដល់ប្រជាប្រិយភាពលើប្រព័ន្ធតុលាការនេះ ទោះជាយើងមិនធ្វើការសន្និដ្ឋានគឺអន្តរជាតិក៏ដូចជាប្រជាពលរដ្ឋគាត់បានមើលឃើញដោយខ្លួនគេហើយ»។
គួររំលឹកថា កាលពីថ្ងៃទី១៣ កុម្ភៈ ឆ្នាំ២០១៧ មេធាវីរបស់លោកនាយករដ្ឋមន្ដ្រី ហ៊ុន សែន គឺលោក គី តិច បានប្តឹងលោក គឹម សុខ បន្ទាប់ពីលោក បានធ្វើអត្ថាធិប្បាយថា គណបក្សប្រជាជនកម្ពុជារបស់លោក ហ៊ុន សែន ជាអ្នកនៅពីក្រោយករណីឃាតកម្មលោក កែម ឡី។ ប៉ុន្តែពាក់ព័ន្ធករណីនេះ លោក ហ៊ុន សែន ក៏បានប្ដឹងទារសំណងជំងឺចិត្តពីលោក គឹម សុខ ជាទឹកប្រាក់ចំនួន៥០ម៉ឺនដុល្លារ។
ក្រៅពីបណ្ដឹងខាងលើនេះ លោក គឹម សុខ ក៏ត្រូវបានលោកនាយករដ្ឋមន្ដ្រី ហ៊ុន សែន ប្តឹងមួយករណីទៀត ដោយចោទរដ្ឋាភិបាលថា បានរៀបចំឲ្យមានប្រព័ន្ធមួយ ដើម្បីសម្លាប់មនុស្ស និងវែកមុខរកឃាតកមិនឃើញ៕