យោធាកូរ៉េខាងត្បូង បាននិយាយនៅថ្ងៃនេះថា យន្តហោះគ្មានមនុស្សបើកមួយដែលត្រូវបានគេរកឃើញនៅដើមខែនេះនៅលើភ្នំនៅជិតតំបន់គ្មានកងទ័ពនោះ ត្រូវបានគេបញ្ជាក់ថា មកពីកូរ៉េខាងជើង ហើយគេចាត់ទុកវាជា “ទង្វើបង្កហេតុធ្ងន់ធ្ងរ” ដែលរំលោភលើបទឈប់បាញ់នៃសង្គ្រាមកូរ៉េ។
មន្ត្រីកូរ៉េខាងត្បូង បាននិយាយដោយខ្លីថា យន្តហោះដ្រូននោះ បានធ្លាក់អំឡុងពេលវិលត្រឡប់ទៅកូរ៉េជើងវិញ ហើយត្រូវបានគេរកឃើញបំពាក់ជាមួយម៉ាស៊ីនថត និងរូបភាពទីតាំងប្រព័ន្ធខែលមីស៊ីលអាមេរមិកថតបានពីលំហរអាកាស ស្ថិតនៅភាគខាងត្បូងនៃកូរ៉េខាងត្បូង។
មន្ត្រីយោធា និងក្រសួងការពារជាតិកូរ៉េខាងត្បូង ប្រាប់ថា ប្រភព និងផ្លូវហោះហើរនៃយន្តហោះដ្រូននោះ ត្រូវបានគេបញ្ជាក់តាមការវិភាគលើកុំព្យូទ័រ និងម៉ាស៊ីនថត។
អ្នកនាំពាក្យក្រសួងការពារជាតិ លោក មូន សាងយ៉ុន បានប្រាប់ថា យន្តហោះដ្រូននោះ ត្រូវបានគេបង្ហោះនៅតំបន់គុមកាងកុន នៅខេត្តកាងវ៉ុន កាលពីថ្ងៃទី២ ខែឧសភា៕