ក្រោយពីបានទទួលផ្ទះអំណោយហើយត្រូវបានគេកាត់ឈ្មោះអោយក្លាយជាម្ចាស់ផ្ទះល្វែងយ៉ាងពេញសិទ្ធិនៅបុរីជ្រោយចង្វារនោះ លោក រិន សាវ៉េត បានចេញមុខអះអាងថាពាក់ព័ន្ធនឹងបញ្ហានេះថា លោកនឹងតស៊ូរក្សាផ្ទះមួយនោះមិនអោយរបួតពីដៃនោះទេ បើទោះជាពេលខាងមុខលោកនឹងប្រឈមការធ្លាក់ខ្លួនបាត់បង់ចំណូលមានជីវភាពដុនដាប ឬឈានទៅខ្ចីបុលអ្នកដទៃដើម្បីផ្គត់ផ្គង់ការរស់នៅ។
លោកថានឹងបណ្ដោយខ្លួនអោយបងប្អូនជាសប្បុរសជនមានការមាក់ងាយនិងជេរប្រទិចចំពោះលោកដោយសារករណីនេះនោះទេ ដោយលោកប្រកាសថាសូម្បីវិធានការដោះដូរទីតាំងដើម្បីលក់ពីកន្លែងថ្ងៃទៅទិញកន្លែងធូរជាងនេះក៏មិនមាននោះដែរ ដើម្បីកុំអោយភស្ដុតាងដែលលោកទទួលបានពីការផ្ដល់អំណោយត្រូវបានបាត់បង់។
លោក រិន សាវ៉េត និយាយថាផ្អែកតាមស្ថានភាពជាក់ស្ដែង លោកពិតជានៅតែមានការប្រឈមមួយខ្ពស់ក្រោយពេលទីផ្សារសិល្បៈរបស់លោកមានការធ្លាក់ចុះគួរអោយកត់សម្គាល់ចុងក្រោយ។ លោកថាថ្វីដ្បិតថាផលិតកម្មហង្សមាសនៅតែបន្តចេញបទអោយលោកថ្មីៗ ដើម្បីពញាក់អារម្មណ៍មហាជន ប៉ុន្តែស្ថានភាពចុងក្រោយគឺមិនមានទីផ្សារណាមួយលេចឡើងដែលជួយអោយលោកទទួលបានឱកាសច្រៀងរាំដែលបានតម្លៃខ្លួនខ្ពស់នោះទេ។
ជាក់ស្ដែងវត្តមានតារាថ្មីៗបានទាំងរុញអោយអ្នកស្ដាប់មួយចំនួនមិនសូវពេញនិយមចំពោះបទចម្រៀងរបស់លោកលើឆាកតន្ត្រីខេត្តក្រុងដែលតម្រូវអោយលោកត្រូវបន្ទាបខ្លួនទៅទទួលច្រៀងអាហ្វែតាមមង្គលការជាថ្នូនឹងការទទួលបានតម្លៃខ្លួនក្នុងមួយយប់មិនច្រើនដូចឱកាសឡើងច្រៀងក្នុងកម្មវិធីប្រគំតន្ត្រីតូចធំ។
លោកថាសម្រាប់កម្មវិធីមង្គលការតារាៗគឺទោះជាមានកេរ្តិ៍ឈ្មោះល្បីល្បាញប៉ុណ្ណា ក៏មិនអាចទទួលបានតម្លៃខ្លួនច្រើនរយដុល្លារនោះទេ លុះត្រាតែតារាម្នាក់នោះត្រូវបានម្ចាស់ពិធីជួលជាពិសេសអោយមកច្រៀងតែម្នាក់ហើយមិនមែនមកច្រៀងតាមរយៈការទទួលអាហ្វែ។
ប៉ុន្តែសម្រាប់រូបលោកគឺទោះតម្លៃប៉ុណ្ណាក៏លោកទទួលច្រៀងដែរដោយលោកបានទាំងចាត់ទុកថាការច្រៀងអាហ្វែនៅក្នុងមង្គលការដែលអញ្ជើញដោយអ្នកបោះមេ និងម្ចាស់សម្អាងការមួយចំនួន គឺឆ្នាំងបាយដ៏សំខាន់របស់ខ្លួននោះផង។
លោកថាស្ថានភាពរស់នៅសឹងនឹងត្រូវផ្ងារជើងដោយសារតែគ្មានការងារច្រៀងខេត្តនិងគ្មានមង្គលការតែចំពោះការចាយវាយគឺនៅដដែលបើទោះជាមានផ្ទះរស់នៅ។ យ៉ាងណាមិញ លោកថានឹងមិនមានការអំពាវនាវណាមួយ ដើម្បីអោយមានការជួយលោកទៀតទេ ដោយសារតែលោកយល់ថាអំណោយទាំងផ្ទះនិងលុយកាក់ដែលលោកទទួលបានក្នុងពេលភរិយាទទួលមរណភាពគឺលើសលប់ដែលលោកអាចបន្តជីវិតរស់បាន។
លោកសារភាពជីវភាពរស់នៅប្រចាំថ្ងៃ លោកមិនហ៊ានចាយវាយខ្ជះខ្ចាយនោះទេ បើទោះជាលោកមានផ្ទះមួយល្វែងនៅបុរីជ្រោយចង្វារដែលអស់បន្ទុកក្នុងការបង់ថ្លៃដូចមុន។ ក្នុងនោះសូម្បីតែការចំណាយលើការសិក្សារបស់កូនក៏លោកសន្សំសំចៃផងដែរ គឺអោយកូនចាយក្នុងមួយថ្ងៃមិនលើសពី២៥០០រៀលឡើយ។
លោកថាខ្លួនត្រូវការរៀបចំបែបផែនសន្សំលុយទុកអោយកូនបន្តការសិក្សាក្នុងពេលខាងមុខ ហើយមិនមានប៉ះពាល់រឿងលក់ផ្ទះចេញដែលជាផ្ទះអំណោយនោះទេ។
លោក រិន សាវ៉េត បានអះអាងថា ស្ថានភាពសុខភាពរបស់លោកមិនអំណោយផលដូចមនុស្សទូទៅនោះទេដោយសារតែពេលកន្លងមកលោកប្រឹងធ្វើការមិនស្គាល់យប់ថ្ងៃដើម្បីយកលុយមកផ្គត់ផ្គង់កូនផង ភរិយាផង និងឈ្នួលផ្ទះផង ហើយបណ្ដាលអោយលោកបាយទឹកមិនសូវទៀងនាំអោយលោកមានជំងឺក្រពះ ពោះវៀនជាយូរមកហើយ។ ពេលខ្លះលោកបាយមិនបាន និងធ្វើទុក្ខជាប្រចាំ តែលោកមិនដេកដួលទេគឺនៅតែបន្តប្រឹងប្រែងធ្វើការដោយមុននេះបន្តិចក៏មានគម្រោងចាប់ដៃជាមួយមិត្តភ័ក្រ្តបើកហាងកាហ្វេលេងអុកតូចមួយដើម្បីរកចំណូលនោះផង។
លោកថាមុខជំនួញថ្មីនេះលោកគ្រោងប្រើទុនប្រមាណជា២ពាន់ដុល្លារ ហើយដើមទុនដែលលោកយកមកប្រើគឺថវិកាជំនួយដែលលោកទទួលបាននាពេលកន្លងមកនោះហើយ គឺលោកមិនយកលុយកាក់ដែលធ្លាប់បាននោះទេទៅចាយខុសខ្ទង់នាំអោយធ្លាក់ខ្លួនជាថ្មីឡើយ។ លោកនៅតែអះអាងថាស្ថានភាពជីវិតរបស់តារាម្នាក់គឺមើលដឹងដោយសារតារាច្រើនហើយគឺប្រឹងបើកហាងរកនេះបើកហាងរកនោះ ប៉ុន្តែលទ្ធផលគឺនៅតែក្រ និងគ្មានលុយមើលខ្លួននៅពេលចាស់ទៅ។
យ៉ាងណាមិញ លោកប្ដេជ្ញាថាមិនគម្រោងលក់ផ្ទះអំណោយដែលបានកាត់ឈ្មោះអោយលោកនៅគ្រប់កាលៈទេសៈ ដើម្បីទុកផ្ទះនោះចែកអោយកូននិងរស់នៅជាមួយកូនក្នុងពេលចាស់ទៅ៕
