លោកនាយករដ្ឋមន្ត្រី ហ៊ុន សែន ស្នើភាគីវៀតណាមជួយជម្រុញឲ្យមានកិច្ចសហការរគ្នារវាងស្ថាប័ននិងអាជ្ញាធរខេត្តជាប់ព្រំដែន ដើម្បីទប់ស្កាត់រាល់អំពើរឧក្រិដ្ឋឆ្លងដែននានា ដែលអាចនឹងកើតមានឡើងនៅតាមព្រំដែនរវាងប្រទេសទាំងពីរ។
បើតាមទំព័រហ្វេសប៊ុកផ្លូវការ ការស្នើនេះ ធ្វើឡើងក្នុងជំនួបពិភាក្សាការងាររវាងលោកនាយករដ្ឋមន្ត្រី ហ៊ុន សែន និងអគ្គលេខាធិការគណៈកម្មាធិការបក្សកុម្មុយនីស្តវៀតណាម លោក ង្វៀន ហ៊្វូជុង នៅឯវិមានសន្តិភាព កាលពីថ្ងៃទី២០ខែកក្កដាម្សិលមិញ។
នៅក្នុងជំនួបពិភាក្សានោះដែរ មេដឹកនាំវៀតណាមនឹងលោកនាយករដ្ឋមន្ត្រី ហ៊ុន សែន បានចុះហេត្ថលេខាលើសេចក្ដីថ្លែងការណ៍រួម ស្ដីពីការពង្រឹងមិត្តភាព និងកិច្ចសហប្រតិបត្តិការរវាងកម្ពុជានិងវៀតណាម និងឯកសារមួយចំនួនទៀត។
បើតាមគម្រោង ដំណើរទស្សនកិច្ចនៅកម្ពុជារយៈពេលពីរថ្ងៃនេះ របស់លោក ង្វៀន ហ៊្វូជុង ក៏នឹងចូលរួមជាអធិបតីក្នុងពិធីសម្ពោធស្តូបអនុស្សាវរីយ៍មិត្តភាពកម្ពុជាវៀតណាម នៅខេត្តព្រះសីហនុ តបតាមការអញ្ជើញរបស់លោក សាយ ឈុំ ប្រធានព្រឹទ្ធសភាកម្ពុជា៕