អង្គការមេត្រីអន្តរជាតិ ជាអង្គការធ្វើការលើការជួញដូរស្ត្រីនៅកម្ពុជាចេញមុខបកស្រាយ និង ធ្វើការសុំទោស ដោយផ្ទាល់ទៅដល់សាធារណជនខ្មែរ ពាក់ព័ន្ធករណីផ្សព្វផ្សាយថា កុមារីកម្ពុជាលក់ព្រហ្មចារី ដោយសារភាពក្រីក្រ។
កាលពីចុងខែកក្កដា កន្លងទៅ ស្ថាប័នព័ត៌មានអន្តរជាតិ CNN បានផ្សព្វផ្សាយវីដេអូខ្លីមួយ មានចំណងជើងថា «ក្មេងស្រីត្រូវបានយកទៅលក់ដោយម្តាយកម្ពុជា» ដែល នៅក្នុងឃ្លីបនោះ ក្មេងស្រីនិយាយភាសាវៀតណាម។ ការផ្សព្វផ្សាយនោះបានសម្ភាសន៍ក្មេងស្រីរងគ្រោះស្នាក់នៅអង្គការមេត្រី បន្ទាប់មកមានប្រតិកម្មពីលោកនាយករដ្ឋមន្ត្រីហ៊ុន សែនចង់បិទអង្គការ។
ថ្លែងនៅក្នុងសន្និសីទសារព័ត៌មាននៅថ្ងៃនេះ នាយកប្រតិបត្តិអង្គការមេត្រីអន្តរជាតិ លោក ឌុន ប៊្រូស្ទើ បានបកស្រាយថា ការចោទប្រកាន់ចំពោះអង្គការរបស់លោកថាអង្គការបានរួមចំណែកផ្តល់ព័ត៌មានដល់ CNN ក្នុងការផ្សព្វផ្សាយពត៌មានមិនពិតអំពីស្ត្រីខ្មែរនេះ គឺជារឿងមិនពិតទេ ហើយថា ការធ្វើការកន្លងមករបស់លោកគឺប្រកបដោយការគោរព ស្រឡាញ់ ដើម្បីជួយដល់ជនរងគ្រោះពីការជួញដូរផ្លូវភេទនៅកម្ពុជា។ ក្នុងនោះ លោកក៏បានធ្វើការសុំទោស ព្រមទាំងមានការសោកស្តាយចំពោះការឈឺចាប់ទាំងឡាយរបស់កម្ពុជា ទាក់ទងឃ្លឹបវីដេអូ របស់ CNN ផងដែរ។
ក្រៅពីសំដែងភាពសោកស្តាយ នាយកប្រតិបត្តិអង្គការមួយនេះ ក៏បានបង្ហាញផងដែរ នូវការងារ និង គម្រោង ជួយកុមារី និង ស្ត្រី រងគ្រោះពីការជួញដូរផ្លូវភេទនៅកម្ពុជា។ តាមការបកស្រាយរបស់ លោក ប៊្រូស្ទើ អង្គការនេះ នៅមានគម្រោងជំនួញចំនួន ១៤ ដែលកំពុង និង គ្រោងនឹងដំណើរការ។ តាមរយៈគម្រោងទាំងនេះ អង្គការបានជួយស្ត្រីនិងកុមារីក្នុងប្រទេសកម្ពុជា ប្រមាណជាង ៤ ពាន់នាក់ហើយ។
គួរបញ្ជាក់ដែរថា ក្រសួងមហាផ្ទៃ បានបិទបញ្ចប់ការស៊ើបអង្គេតលើ អង្គការ AIM នេះរួចហើយ ហើយកំពុងតែធ្វើរបាយការណ៍បន្តទៅកាន់នាយករដ្ឋមន្ត្រីដើម្បីសម្រេច ថាតើគួរតែបិទ ឬ មិនបិទអង្គការមួយនេះ៕
